פסוקים על Kings

580 פסוקים · 175 היבטים

פסוקי מפתח

סינון לפי ספר
  1. 2 דִּבְרֵי הַיָּמִים כ״ה:כ״ג

    ואת אמציהו מלך יהודה בן יואש בן יהואחז תפש יואש מלך ישראל בבית שמש ויביאהו ירושלם ויפרץ בחומת ירושלם משער אפרים עד שער הפונה ארבע מאות אמה׃

  2. 2 דִּבְרֵי הַיָּמִים כ״ה:כ״ד

    וכל הזהב והכסף ואת כל הכלים הנמצאים בבית האלהים עם עבד אדום ואת אצרות בית המלך ואת בני התערבות וישב שמרון׃

  3. 2 דִּבְרֵי הַיָּמִים כ״ה:כ״ה

    ויחי אמציהו בן יואש מלך יהודה אחרי מות יואש בן יהואחז מלך ישראל חמש עשרה שנה׃

  4. 2 דִּבְרֵי הַיָּמִים כ״ה:כ״ו

    ויתר דברי אמציהו הראשנים והאחרונים הלא הנם כתובים על ספר מלכי יהודה וישראל׃

  5. 2 דִּבְרֵי הַיָּמִים כ״ה:כ״ז

    ומעת אשר סר אמציהו מאחרי יהוה ויקשרו עליו קשר בירושלם וינס לכישה וישלחו אחריו לכישה וימיתהו שם׃

  6. 2 דִּבְרֵי הַיָּמִים כ״ה:כ״ח

    וישאהו על הסוסים ויקברו אתו עם אבתיו בעיר יהודה׃

  7. 2 דִּבְרֵי הַיָּמִים כ״ו:א׳

    ¶ ויקחו כל עם יהודה את עזיהו והוא בן שש עשרה שנה וימליכו אתו תחת אביו אמציהו׃

  8. 2 דִּבְרֵי הַיָּמִים כ״ו:ב׳

    הוא בנה את אילות וישיבה ליהודה אחרי שכב המלך עם אבתיו׃

  9. 2 דִּבְרֵי הַיָּמִים כ״ו:ג׳

    בן שש עשרה שנה עזיהו במלכו וחמשים ושתים שנה מלך בירושלם ושם אמו יכיליה מן ירושלם׃

  10. 2 דִּבְרֵי הַיָּמִים כ״ו:ד׳

    ויעש הישר בעיני יהוה ככל אשר עשה אמציהו אביו׃

  11. 2 דִּבְרֵי הַיָּמִים כ״ו:ה׳

    ויהי לדרש אלהים בימי זכריהו המבין בראת האלהים ובימי דרשו את יהוה הצליחו האלהים׃

  12. 2 דִּבְרֵי הַיָּמִים כ״ו:ו׳

    ויצא וילחם בפלשתים ויפרץ את חומת גת ואת חומת יבנה ואת חומת אשדוד ויבנה ערים באשדוד ובפלשתים׃

  13. 2 דִּבְרֵי הַיָּמִים כ״ו:ז׳

    ויעזרהו האלהים על פלשתים ועל הערביים הישבים בגור בעל והמעונים׃

  14. 2 דִּבְרֵי הַיָּמִים כ״ו:ח׳

    ויתנו העמונים מנחה לעזיהו וילך שמו עד לבוא מצרים כי החזיק עד למעלה׃

  15. 2 דִּבְרֵי הַיָּמִים כ״ו:ט׳

    ויבן עזיהו מגדלים בירושלם על שער הפנה ועל שער הגיא ועל המקצוע ויחזקם׃

  16. 2 דִּבְרֵי הַיָּמִים כ״ו:י׳

    ויבן מגדלים במדבר ויחצב ברות רבים כי מקנה רב היה לו ובשפלה ובמישור אכרים וכרמים בהרים ובכרמל כי אהב אדמה היה׃

  17. 2 דִּבְרֵי הַיָּמִים כ״ו:י״א

    ויהי לעזיהו חיל עשה מלחמה יוצאי צבא לגדוד במספר פקדתם ביד יעואל הסופר ומעשיהו השוטר על יד חנניהו משרי המלך׃

  18. 2 דִּבְרֵי הַיָּמִים כ״ו:י״ב

    כל מספר ראשי האבות לגבורי חיל אלפים ושש מאות׃

  19. 2 דִּבְרֵי הַיָּמִים כ״ו:י״ג

    ועל ידם חיל צבא שלש מאות אלף ושבעת אלפים וחמש מאות עושי מלחמה בכח חיל לעזר למלך על האויב׃

  20. 2 דִּבְרֵי הַיָּמִים כ״ו:י״ד

    ויכן להם עזיהו לכל הצבא מגנים ורמחים וכובעים ושרינות וקשתות ולאבני קלעים׃

  21. 2 דִּבְרֵי הַיָּמִים כ״ו:ט״ו

    ויעש בירושלם חשבנות מחשבת חושב להיות על המגדלים ועל הפנות לירוא בחצים ובאבנים גדלות ויצא שמו עד למרחוק כי הפליא להעזר עד כי חזק׃

  22. 2 דִּבְרֵי הַיָּמִים כ״ו:ט״ז

    וכחזקתו גבה לבו עד להשחית וימעל ביהוה אלהיו ויבא אל היכל יהוה להקטיר על מזבח הקטרת׃

  23. 2 דִּבְרֵי הַיָּמִים כ״ו:י״ז

    ויבא אחריו עזריהו הכהן ועמו כהנים ליהוה שמונים בני חיל׃

  24. 2 דִּבְרֵי הַיָּמִים כ״ו:י״ח

    ויעמדו על עזיהו המלך ויאמרו לו לא לך עזיהו להקטיר ליהוה כי לכהנים בני אהרן המקדשים להקטיר צא מן המקדש כי מעלת ולא לך לכבוד מיהוה אלהים׃

  25. 2 דִּבְרֵי הַיָּמִים כ״ו:י״ט

    ויזעף עזיהו ובידו מקטרת להקטיר ובזעפו עם הכהנים והצרעת זרחה במצחו לפני הכהנים בבית יהוה מעל למזבח הקטרת׃