פסוקים על Kings

580 פסוקים · 175 היבטים

פסוקי מפתח

סינון לפי ספר
  1. 1 מְלָכִים י״ב:ט״ו

    ולא שמע המלך אל העם כי היתה סבה מעם יהוה למען הקים את דברו אשר דבר יהוה ביד אחיה השילני אל ירבעם בן נבט׃

  2. 1 מְלָכִים י״ב:ט״ז

    וירא כל ישראל כי לא שמע המלך אליהם וישבו העם את המלך דבר לאמר מה לנו חלק בדוד ולא נחלה בבן ישי לאהליך ישראל עתה ראה ביתך דוד וילך ישראל לאהליו׃

  3. 1 מְלָכִים י״ב:י״ז

    ובני ישראל הישבים בערי יהודה וימלך עליהם רחבעם׃

  4. 1 מְלָכִים י״ב:י״ח

    וישלח המלך רחבעם את אדרם אשר על המס וירגמו כל ישראל בו אבן וימת והמלך רחבעם התאמץ לעלות במרכבה לנוס ירושלם׃

  5. 1 מְלָכִים י״ב:י״ט

    ויפשעו ישראל בבית דוד עד היום הזה׃

  6. 1 מְלָכִים י״ב:כ׳

    ויהי כשמע כל ישראל כי שב ירבעם וישלחו ויקראו אתו אל העדה וימליכו אתו על כל ישראל לא היה אחרי בית דוד זולתי שבט יהודה לבדו׃

  7. 1 מְלָכִים י״ב:כ״א

    ויבאו רחבעם ירושלם ויקהל את כל בית יהודה ואת שבט בנימן מאה ושמנים אלף בחור עשה מלחמה להלחם עם בית ישראל להשיב את המלוכה לרחבעם בן שלמה׃

  8. 1 מְלָכִים י״ב:כ״ב

    ויהי דבר האלהים אל שמעיה איש האלהים לאמר׃

  9. 1 מְלָכִים י״ב:כ״ג

    אמר אל רחבעם בן שלמה מלך יהודה ואל כל בית יהודה ובנימין ויתר העם לאמר׃

  10. 1 מְלָכִים י״ב:כ״ד

    כה אמר יהוה לא תעלו ולא תלחמון עם אחיכם בני ישראל שובו איש לביתו כי מאתי נהיה הדבר הזה וישמעו את דבר יהוה וישבו ללכת כדבר יהוה׃

  11. 1 מְלָכִים י״ד:כ״א

    ורחבעם בן שלמה מלך ביהודה בן ארבעים ואחת שנה רחבעם במלכו ושבע עשרה שנה מלך בירושלם העיר אשר בחר יהוה לשום את שמו שם מכל שבטי ישראל ושם אמו נעמה העמנית׃

  12. 1 מְלָכִים י״ד:כ״ב

    ויעש יהודה הרע בעיני יהוה ויקנאו אתו מכל אשר עשו אבתם בחטאתם אשר חטאו׃

  13. 1 מְלָכִים י״ד:כ״ג

    ויבנו גם המה להם במות ומצבות ואשרים על כל גבעה גבהה ותחת כל עץ רענן׃

  14. 1 מְלָכִים י״ד:כ״ד

    וגם קדש היה בארץ עשו ככל התועבת הגוים אשר הוריש יהוה מפני בני ישראל׃

  15. 1 מְלָכִים י״ד:כ״ה

    ויהי בשנה החמישית למלך רחבעם עלה שושק מלך מצרים על ירושלם׃

  16. 1 מְלָכִים י״ד:כ״ו

    ויקח את אצרות בית יהוה ואת אוצרות בית המלך ואת הכל לקח ויקח את כל מגני הזהב אשר עשה שלמה׃

  17. 1 מְלָכִים י״ד:כ״ז

    ויעש המלך רחבעם תחתם מגני נחשת והפקיד על יד שרי הרצים השמרים פתח בית המלך׃

  18. 1 מְלָכִים י״ד:כ״ח

    ויהי מדי בא המלך בית יהוה ישאום הרצים והשיבום אל תא הרצים׃

  19. 1 מְלָכִים י״ד:כ״ט

    ויתר דברי רחבעם וכל אשר עשה הלא המה כתובים על ספר דברי הימים למלכי יהודה׃

  20. 1 מְלָכִים י״ד:ל׳

    ומלחמה היתה בין רחבעם ובין ירבעם כל הימים׃

  21. 1 מְלָכִים י״ד:ל״א

    וישכב רחבעם עם אבתיו ויקבר עם אבתיו בעיר דוד ושם אמו נעמה העמנית וימלך אבים בנו תחתיו׃

  22. 1 מְלָכִים ט״ו:א׳

    ¶ ובשנת שמנה עשרה למלך ירבעם בן נבט מלך אבים על יהודה׃

  23. 1 מְלָכִים ט״ו:ב׳

    שלש שנים מלך בירושלם ושם אמו מעכה בת אבישלום׃

  24. 1 מְלָכִים ט״ו:ג׳

    וילך בכל חטאות אביו אשר עשה לפניו ולא היה לבבו שלם עם יהוה אלהיו כלבב דוד אביו׃

  25. 1 מְלָכִים ט״ו:ד׳

    כי למען דוד נתן יהוה אלהיו לו ניר בירושלם להקים את בנו אחריו ולהעמיד את ירושלם׃