Psalms बद्दल बायबलमधील वचने

आमचे परमेश्वर याहवेह, यांच्या समान कोण आहे, जे सर्वोच्च स्थानी सिंहासनावर विराजमान असतात,

जे वरून ओणवून, गगनमंडळ आणि पृथ्वीचे अवलोकन करतात?

ते दीनांस धुळीतून वर काढतात, आणि गरजवंतास राखेच्या ढिगार्‍यातून वर उचलून घेतात;

ते त्यांना राजपुत्रांबरोबर, आपल्या प्रजेच्या प्रधानांसह बसवितात.

ते निपुत्रिक गृहिणीला तिच्या घरात स्थिरावतात, आणि तिला मुले देऊन आनंदी माता बनवितात. याहवेहचे स्तवन करा.

जेव्हा इस्राएल इजिप्तमधून, परकीय भाषेच्या लोकातून याकोब बाहेर पडला,

यहूदाह परमेश्वराचे पवित्रस्थान, आणि इस्राएल त्यांचे सार्वभौमत्व झाले.

तांबड्या समुद्राने हे पाहून पळ काढला, आणि यार्देन नदी माघारी गेली;

पर्वतांनी मेंढ्यांप्रमाणे आणि टेकड्यांनी कोकरांसारख्या उड्या मारल्या.

हे समुद्रा, तू पलायन का केले? अगे यार्देने, तू मागे का फिरलीस?

पर्वतांनो, तुम्ही मेंढ्यांप्रमाणे, टेकड्यांनो, तुम्ही कोकरांसारखे का बागडलात?

अगे पृथ्वी, तू परमेश्वराच्या समक्षतेत, याकोबाच्या देवासमोर, थरथर काप.

कारण त्यांनीच खडकाचे झर्‍यात रूपांतर केले, अत्यंत कणखर खडकास जलाचे स्त्रोत बनविले.

प्रवाशांचे आराधना गीत. संकटसमयी मी याहवेहकडे आरोळी मारली, आणि त्यांनी ती ऐकली.

हे याहवेह, असत्य बोलणार्‍या ओठांपासून व कपटी जिव्हेपासून माझा बचाव करा.

अगे कपटी जिभे, ते तुला काय करतील, आणखी तुला कशी वागणूक मिळेल?

ते तुला योद्ध्यांच्या तीक्ष्ण बाणांनी, केरसुणीच्या लाकडांच्या निखार्‍यांनी दंड करतील.

धिक्कार असो माझा, जर मी मेशेख हे माझे निवासस्थान केले, वा केदार येथे माझा डेरा घातला!

जे शांतिप्रिय नाहीत अशा लोकांसह राहण्यात मी बराच काळ घालविला आहे.

मी तर शांतताप्रिय आहे; पण मी काही बोलताच ते युद्धास तयार होतात.

प्रवाशांचे आराधना गीत. मी आपली दृष्टी पर्वताकडे लावतो— मला साहाय्य कुठून येईल?

स्वर्ग व पृथ्वीचे निर्माणकर्ते याहवेह, तेच माझ्या साहाय्यतेचा उगम आहेत.

ते तुझा पाय कदापि घसरू देणार नाहीत; तुझे रक्षक डुलकीही घेत नाही.

खरोखर जे इस्राएलचे रक्षक आहेत ते झोपी जात नाहीत किंवा डुलकीही घेत नाहीत.

याहवेह स्वतः तुझे रक्षण करतात— याहवेह तुझ्या उजव्या हाताजवळ सावलीसारखे आहेत.