פסוקים על Commerce

והם לא ידעו כי שמע יוסף כי המליץ בינתם׃

ויסב מעליהם ויבך וישב אלהם וידבר אלהם ויקח מאתם את שמעון ויאסר אתו לעיניהם׃

ויצו יוסף וימלאו את כליהם בר ולהשיב כספיהם איש אל שקו ולתת להם צדה לדרך ויעש להם כן׃

וישאו את שברם על חמריהם וילכו משם׃

ויפתח האחד את שקו לתת מספוא לחמרו במלון וירא את כספו והנה הוא בפי אמתחתו׃

ויאמר אל אחיו הושב כספי וגם הנה באמתחתי ויצא לבם ויחרדו איש אל אחיו לאמר מה זאת עשה אלהים לנו׃

ויבאו אל יעקב אביהם ארצה כנען ויגידו לו את כל הקרת אתם לאמר׃

דבר האיש אדני הארץ אתנו קשות ויתן אתנו כמרגלים את הארץ׃

ונאמר אליו כנים אנחנו לא היינו מרגלים׃

שנים עשר אנחנו אחים בני אבינו האחד איננו והקטן היום את אבינו בארץ כנען׃

ויאמר אלינו האיש אדני הארץ בזאת אדע כי כנים אתם אחיכם האחד הניחו אתי ואת רעבון בתיכם קחו ולכו׃

והביאו את אחיכם הקטן אלי ואדעה כי לא מרגלים אתם כי כנים אתם את אחיכם אתן לכם ואת הארץ תסחרו׃

מאזני צדק אבני צדק איפת צדק והין צדק יהיה לכם אני יהוה אלהיכם אשר הוצאתי אתכם מארץ מצרים׃

ושמרתם את כל חקתי ואת כל משפטי ועשיתם אתם אני יהוה׃

וישלח חירם באני את עבדיו אנשי אניות ידעי הים עם עבדי שלמה׃

ויבאו אופירה ויקחו משם זהב ארבע מאות ועשרים ככר ויבאו אל המלך שלמה׃

וכל כלי משקה המלך שלמה זהב וכל כלי בית יער הלבנון זהב סגור אין כסף נחשב בימי שלמה למאומה׃

כי אניות למלך הלכות תרשיש עם עבדי חורם אחת לשלוש שנים תבואנה אניות תרשיש נשאות זהב וכסף שנהבים וקופים ותוכיים׃

ויגדל המלך שלמה מכל מלכי הארץ לעשר וחכמה׃

יורדי הים באניות עשי מלאכה במים רבים׃

המה ראו מעשי יהוה ונפלאותיו במצולה׃

ויאמר ויעמד רוח סערה ותרומם גליו׃

יעלו שמים ירדו תהומות נפשם ברעה תתמוגג׃

יחוגו וינועו כשכור וכל חכמתם תתבלע׃

ויצעקו אל יהוה בצר להם וממצוקתיהם יוציאם׃