סנט מארק י״ד:י״ז-ע״ב

סנט מארק י״ד:י״ז-ע״ב

י״ז
ויהי בערב ויבא עם שנים העשר׃
י״ח
ויסבו ויאכלו ויאמר ישוע אמן אמר אני לכם אחד מכם האכל אתי ימסרני׃
י״ט
ויחלו להתעצב ויאמרו אליו זה אחר זה הכי אני הוא׃
כ׳
ויען ויאמר אליהם אחד משנים העשר הוא הטבל עמי בקערה׃
כ״א
הן בן האדם הלך ילך כאשר כתוב עליו אבל אוי לאיש ההוא אשר על ידו ימסר בן האדם טוב לאיש ההוא שלא נולד׃
כ״ב
ויהי באכלם ויקח ישוע לחם ויברך ויבצע ויתן להם ויאמר קחו אכלו זה הוא גופי׃
כ״ג
ויקח את הכוס ויברך ויתן להם וישתו ממנה כלם׃
כ״ד
ויאמר להם זה הוא דמי דם הברית החדשה הנשפך בעד רבים׃
כ״ה
אמן אמר אני לכם שתה לא אשתה עוד מתנובת הגפן עד היום ההוא אשר אשתה אותה חדשה במלכות האלהים׃
כ״ו
ואחרי גמרם את ההלל ויצאו אל הר הזיתים׃
כ״ז
ויאמר אליהם ישוע אתם כלכם תכשלו בי בלילה הזה כי כתוב אכה את הרעה ותפוצין הצאן׃
כ״ח
ואחרי קומי מן המתים אלך לפניכם הגלילה׃
כ״ט
ויאמר אליו פטרוס גם אם כלם יכשלו אני לא אכשל׃
ל׳
ויאמר אליו ישוע אמן אמר אני לך כי היום בלילה הזה בטרם יקרא התרנגול פעמים אתה תכחש בי שלש פעמים׃
ל״א
והוא התחזק ויוסף לדבר ויאמר גם כי יהיה עלי למות אתך כחש לא אכחש בך וכן אמרו גם כלם׃
ל״ב
ויבאו אל חצר גת שמני שמו ויאמר אל תלמידיו שבו לכם פה עד אשר אתפלל׃
ל״ג
ויקח אתו את פטרוס ואת יעקב ואת יוחנן ויחל להשמים ולמוג׃
ל״ד
ויאמר אליהם נפשי מרה לי עד מות עמדו פה ושקדו׃
ל״ה
ויעבר משם מעט והלאה ויפל ארצה ויתפלל אשר אם יוכל היות תעבר נא מעליו השעה הזאת׃
ל״ו
ויאמר אבא אבי הכל תוכל העבר נא מעלי את הכוס הזאת אך לא את אשר אני רוצה כי אם את אשר אתה׃
ל״ז
ויבא וימצאם ישנים ויאמר אל פטרוס שמעון התישן הכי לא יכלת לשקד שעה אחת׃
ל״ח
שקדו והתפללו פן תבאו לידי נסיון הן הרוח היא חפצה והבשר רפה׃
ל״ט
ויסף לסור ויתפלל באמרו עוד הפעם כדברים ההמה׃
מ׳
וישב וימצאם שנית ישנים כי עיניהם היו כבדות ולא ידעו מה יענהו׃
מ״א
ויבא פעם שלישית ויאמר אליהם מעתה נומו ונוחו רב לי כי באה השעה הנה בן האדם נמסר בידי חטאים׃
מ״ב
קומו ונלכה הנה המוסר אותי קרב׃
מ״ג
עודנו מדבר ויהודה בא והוא אחד משנים העשר ועמו המון רב בחרבות ובמקלות מאת הכהנים הגדולים והסופרים והזקנים׃
מ״ד
והמוסר אתו נתן להם אות לאמר האיש אשר אשקהו זה הוא אותו תפשו והוליכהו אל ימלט׃
מ״ה
הוא בא והוא נגש אליו ויאמר רבי רבי וינשק לו׃
מ״ו
וישלחו בו את ידיהם ויתפשהו׃
מ״ז
ואחד מן העמדים אצלו שלף את חרבו ויך את עבד הכהן הגדול ויקצץ את אזנו׃
מ״ח
ויען ישוע ויאמר אליהם כמו על פריץ יצאתם עלי בחרבות ובמקלות לתפשני׃
מ״ט
ויום יום הייתי אצלכם מלמד במקדש ולא החזקתם בי אבל למען ימלאו הכתובים׃
נ׳
ויעזבו אותו כלם וינוסו׃
נ״א
ונער אחד הלך אחריו מעטף בסדין לכסות את ערותו ויאחזהו הנערים׃
נ״ב
והוא עזב את הסדין בידם וינס ערם מפניהם׃
נ״ג
ויוליכו את ישוע אל הכהן הגדול ויקהלו אתו כל הכהנים הגדולים והזקנים והסופרים׃
נ״ד
ופטרוס הלך אחריו מרחוק עד לחצר הכהן הגדול פנימה וישב שם עם המשרתים ויתחמם נגד האור׃
נ״ה
וראשי הכהנים וכל הסנהדרין בקשו עדות על ישוע להמיתו ולא מצאו׃
נ״ו
כי רבים ענו בו עדות שקר אך העדיות לא היו שות׃
נ״ז
ויקומו אנשים ויענו בו עדות שקר לאמר׃
נ״ח
שמענו אתו אמר אני אהרס את ההיכל הזה מעשה ידי אדם ולשלשת ימים אבנה היכל אחר אשר איננו מעשה ידי אדם׃
נ״ט
וגם בזאת עדותם לא שותה׃
ס׳
ויקם הכהן הגדול ויעמד בתוך וישאל את ישוע לאמר האינך משיב דבר מה זה אלה ענים בך׃
ס״א
והוא החריש ולא השיב דבר ויוסף עוד הכהן הגדול לשאל אתו ויאמר אליו האתה הוא המשיח בן המברך׃
ס״ב
ויאמר ישוע אני הוא ואתם תראו את בן האדם יושב לימין הגבורה ובא עם ענני השמים׃
ס״ג
ויקרע הכהן הגדול את בגדיו ויאמר מה לנו עוד לבקש עדים׃
ס״ד
שמעתם את הגדוף מה דעתכם וירשיעהו כלם כי חיב מיתה הוא׃
ס״ה
ויחלו מהם לרק בו ויחפו את פניו ויכהו באגרף ויאמרו אליו הנבא והמשרתים הכאיבהו בהכותם אותו על הלחי׃
ס״ו
ויהי בהיות פטרוס בתחתית החצר ותבא אחת משפחות הכהן הגדול׃
ס״ז
ותרא את פטרוס כי מתחמם הוא ותבט בו ותאמר גם אתה היית עם הנצרי ישוע׃
ס״ח
ויכחש לאמר לא אדע ולא אבין מה את אמרת ויצא החוצה אל האולם והתרנגל קרא׃
ס״ט
ותראהו השפחה ותוסף ותאמר אל העמדים שם כי זה הוא אחד מהם ויכחש פעם שנית׃
ע׳
וכמעט אחרי כן גם העמדים שם אמרו אל פטרוס אמנם אתה אחד מהם כי אף גלילי אתה ולשונך כלשונם׃
ע״א
ויחל להחרים את נפשו ולהשבע לאמר לא יעדתי את האיש הזה אשר אמרתם׃
ע״ב
והתרנגל קרא פעם שנית ויזכר פטרוס את הדבר אשר אמר לו ישוע בטרם יקרא התרנגל פעמים תכחש בי שלש פעמים וישם אל לבו ויבך׃
קרא פרק מלא י״ד
Settings

Reading Style

Typeface

Font Size 19px

Reading Width 45 chars

Options