פסוקים על Prayer

ולא נסוג ממך תחינו ובשמך נקרא׃

בצרה קראת ואחלצך אענך בסתר רעם אבחנך על מי מריבה סלה׃

אנכי יהוה אלהיך המעלך מארץ מצרים הרחב פיך ואמלאהו׃

¶ שיר מזמור לאסף אלהים אל דמי לך אל תחרש ואל תשקט אל׃

כי הנה אויביך יהמיון ומשנאיך נשאו ראש׃

אלהי שיתמו כגלגל כקש לפני רוח׃

כאש תבער יער וכלהבה תלהט הרים׃

כן תרדפם בסערך ובסופתך תבהלם׃

מלא פניהם קלון ויבקשו שמך יהוה׃

יבשו ויבהלו עדי עד ויחפרו ויאבדו׃

וידעו כי אתה שמך יהוה לבדך עליון על כל הארץ׃

¶ תפלה לדוד הטה יהוה אזנך ענני כי עני ואביון אני׃

שמרה נפשי כי חסיד אני הושע עבדך אתה אלהי הבוטח אליך׃

חנני אדני כי אליך אקרא כל היום׃

שמח נפש עבדך כי אליך אדני נפשי אשא׃

כי אתה אדני טוב וסלח ורב חסד לכל קראיך׃

האזינה יהוה תפלתי והקשיבה בקול תחנונותי׃

ביום צרתי אקראך כי תענני׃

עשה עמי אות לטובה ויראו שנאי ויבשו כי אתה יהוה עזרתני ונחמתני׃

¶ שיר מזמור לבני קרח למנצח על מחלת לענות משכיל להימן האזרחי יהוה אלהי ישועתי יום צעקתי בלילה נגדך׃

תבוא לפניך תפלתי הטה אזנך לרנתי׃

עיני דאבה מני עני קראתיך יהוה בכל יום שטחתי אליך כפי׃

ואני אליך יהוה שועתי ובבקר תפלתי תקדמך׃

למה יהוה תזנח נפשי תסתיר פניך ממני׃

איה חסדיך הראשנים אדני נשבעת לדוד באמונתך׃