פסוקים על Prayer: Prayer test proposed by Elijah

16 פסוקים · 120 היבטים

פסוקים על Prayer test proposed by Elijah

  1. 1 מְלָכִים י״ח:כ״ד

    וקראתם בשם אלהיכם ואני אקרא בשם יהוה והיה האלהים אשר יענה באש הוא האלהים ויען כל העם ויאמרו טוב הדבר׃

  2. 1 מְלָכִים י״ח:כ״ה

    ויאמר אליהו לנביאי הבעל בחרו לכם הפר האחד ועשו ראשנה כי אתם הרבים וקראו בשם אלהיכם ואש לא תשימו׃

  3. 1 מְלָכִים י״ח:כ״ו

    ויקחו את הפר אשר נתן להם ויעשו ויקראו בשם הבעל מהבקר ועד הצהרים לאמר הבעל עננו ואין קול ואין ענה ויפסחו על המזבח אשר עשה׃

  4. 1 מְלָכִים י״ח:כ״ז

    ויהי בצהרים ויהתל בהם אליהו ויאמר קראו בקול גדול כי אלהים הוא כי שיח וכי שיג לו וכי דרך לו אולי ישן הוא ויקץ׃

  5. 1 מְלָכִים י״ח:כ״ח

    ויקראו בקול גדול ויתגדדו כמשפטם בחרבות וברמחים עד שפך דם עליהם׃

  6. 1 מְלָכִים י״ח:כ״ט

    ויהי כעבר הצהרים ויתנבאו עד לעלות המנחה ואין קול ואין ענה ואין קשב׃

  7. 1 מְלָכִים י״ח:ל׳

    ויאמר אליהו לכל העם גשו אלי ויגשו כל העם אליו וירפא את מזבח יהוה ההרוס׃

  8. 1 מְלָכִים י״ח:ל״א

    ויקח אליהו שתים עשרה אבנים כמספר שבטי בני יעקב אשר היה דבר יהוה אליו לאמר ישראל יהיה שמך׃

  9. 1 מְלָכִים י״ח:ל״ב

    ויבנה את האבנים מזבח בשם יהוה ויעש תעלה כבית סאתים זרע סביב למזבח׃

  10. 1 מְלָכִים י״ח:ל״ג

    ויערך את העצים וינתח את הפר וישם על העצים׃

  11. 1 מְלָכִים י״ח:ל״ד

    ויאמר מלאו ארבעה כדים מים ויצקו על העלה ועל העצים ויאמר שנו וישנו ויאמר שלשו וישלשו׃

  12. 1 מְלָכִים י״ח:ל״ה

    וילכו המים סביב למזבח וגם את התעלה מלא מים׃

  13. 1 מְלָכִים י״ח:ל״ו

    ויהי בעלות המנחה ויגש אליהו הנביא ויאמר יהוה אלהי אברהם יצחק וישראל היום יודע כי אתה אלהים בישראל ואני עבדך ובדבריך עשיתי את כל הדברים האלה׃

  14. 1 מְלָכִים י״ח:ל״ז

    ענני יהוה ענני וידעו העם הזה כי אתה יהוה האלהים ואתה הסבת את לבם אחרנית׃

  15. 1 מְלָכִים י״ח:ל״ח

    ותפל אש יהוה ותאכל את העלה ואת העצים ואת האבנים ואת העפר ואת המים אשר בתעלה לחכה׃

  16. 1 מְלָכִים י״ח:ל״ט

    וירא כל העם ויפלו על פניהם ויאמרו יהוה הוא האלהים יהוה הוא האלהים׃