פסוקים על Patriotism

שאלו שלום ירושלם ישליו אהביך׃

יהי שלום בחילך שלוה בארמנותיך׃

יברכך יהוה מציון וראה בטוב ירושלם כל ימי חייך׃

וראה בנים לבניך שלום על ישראל׃

¶ על נהרות בבל שם ישבנו גם בכינו בזכרנו את ציון׃

על ערבים בתוכה תלינו כנרותינו׃

כי שם שאלונו שובינו דברי שיר ותוללינו שמחה שירו לנו משיר ציון׃

איך נשיר את שיר יהוה על אדמת נכר׃

אם אשכחך ירושלם תשכח ימיני׃

תדבק לשוני לחכי אם לא אזכרכי אם לא אעלה את ירושלם על ראש שמחתי׃

¶ למען ציון לא אחשה ולמען ירושלם לא אשקוט עד יצא כנגה צדקה וישועתה כלפיד יבער׃

וירפו את שבר בת עמי על נקלה לאמר שלום שלום ואין שלום׃

על שבר בת עמי השברתי קדרתי שמה החזקתני׃

הצרי אין בגלעד אם רפא אין שם כי מדוע לא עלתה ארכת בת עמי׃

¶ מי יתן ראשי מים ועיני מקור דמעה ואבכה יומם ולילה את חללי בת עמי׃

מי יתנני במדבר מלון ארחים ואעזבה את עמי ואלכה מאתם כי כלם מנאפים עצרת בגדים׃

¶ זכר יהוה מה היה לנו הביט וראה את חרפתנו׃

נחלתנו נהפכה לזרים בתינו לנכרים׃

יתומים היינו אין אב אמתינו כאלמנות׃

מימינו בכסף שתינו עצינו במחיר יבאו׃

על צוארנו נרדפנו יגענו לא הונח לנו׃

מצרים נתנו יד אשור לשבע לחם׃

אבתינו חטאו אינם אנחנו עונתיהם סבלנו׃

עבדים משלו בנו פרק אין מידם׃

בנפשנו נביא לחמנו מפני חרב המדבר׃