פסוקים על Select Readings

בחצצרות וקול שופר הריעו לפני המלך יהוה׃

ירעם הים ומלאו תבל וישבי בה׃

נהרות ימחאו כף יחד הרים ירננו׃

לפני יהוה כי בא לשפט הארץ ישפט תבל בצדק ועמים במישרים׃

¶ על נהרות בבל שם ישבנו גם בכינו בזכרנו את ציון׃

על ערבים בתוכה תלינו כנרותינו׃

כי שם שאלונו שובינו דברי שיר ותוללינו שמחה שירו לנו משיר ציון׃

איך נשיר את שיר יהוה על אדמת נכר׃

אם אשכחך ירושלם תשכח ימיני׃

תדבק לשוני לחכי אם לא אזכרכי אם לא אעלה את ירושלם על ראש שמחתי׃

זכר יהוה לבני אדום את יום ירושלם האמרים ערו ערו עד היסוד בה׃

בת בבל השדודה אשרי שישלם לך את גמולך שגמלת לנו׃

אשרי שיאחז ונפץ את עלליך אל הסלע׃

¶ וזכר את בוראיך בימי בחורתיך עד אשר לא יבאו ימי הרעה והגיעו שנים אשר תאמר אין לי בהם חפץ׃

עד אשר לא תחשך השמש והאור והירח והכוכבים ושבו העבים אחר הגשם׃

ביום שיזעו שמרי הבית והתעותו אנשי החיל ובטלו הטחנות כי מעטו וחשכו הראות בארבות׃

וסגרו דלתים בשוק בשפל קול הטחנה ויקום לקול הצפור וישחו כל בנות השיר׃

גם מגבה יראו וחתחתים בדרך וינאץ השקד ויסתבל החגב ותפר האביונה כי הלך האדם אל בית עולמו וסבבו בשוק הספדים׃

עד אשר לא ירחק חבל הכסף ותרץ גלת הזהב ותשבר כד על המבוע ונרץ הגלגל אל הבור׃

וישב העפר על הארץ כשהיה והרוח תשוב אל האלהים אשר נתנה׃

¶ יששום מדבר וציה ותגל ערבה ותפרח כחבצלת׃

פרח תפרח ותגל אף גילת ורנן כבוד הלבנון נתן לה הדר הכרמל והשרון המה יראו כבוד יהוה הדר אלהינו׃

חזקו ידים רפות וברכים כשלות אמצו׃

אמרו לנמהרי לב חזקו אל תיראו הנה אלהיכם נקם יבוא גמול אלהים הוא יבוא וישעכם׃

אז תפקחנה עיני עורים ואזני חרשים תפתחנה׃