פסוקים על Select Readings: Man in extremity

19 פסוקים · 47 היבטים

פסוקים על Man in extremity

תְהִלִּים י״ח:א׳
¶ למנצח לעבד יהוה לדוד אשר דבר ליהוה את דברי השירה הזאת ביום הציל יהוה אותו מכף כל איביו ומיד שאול ויאמר ארחמך יהוה חזקי׃
תְהִלִּים י״ח:ב׳
יהוה סלעי ומצודתי ומפלטי אלי צורי אחסה בו מגני וקרן ישעי משגבי׃
תְהִלִּים י״ח:ג׳
מהלל אקרא יהוה ומן איבי אושע׃
תְהִלִּים י״ח:ד׳
אפפוני חבלי מות ונחלי בליעל יבעתוני׃
תְהִלִּים י״ח:ה׳
חבלי שאול סבבוני קדמוני מוקשי מות׃
תְהִלִּים י״ח:ו׳
בצר לי אקרא יהוה ואל אלהי אשוע ישמע מהיכלו קולי ושועתי לפניו תבוא באזניו׃
תְהִלִּים י״ח:ז׳
ותגעש ותרעש הארץ ומוסדי הרים ירגזו ויתגעשו כי חרה לו׃
תְהִלִּים י״ח:ח׳
עלה עשן באפו ואש מפיו תאכל גחלים בערו ממנו׃
תְהִלִּים י״ח:ט׳
ויט שמים וירד וערפל תחת רגליו׃
תְהִלִּים י״ח:י׳
וירכב על כרוב ויעף וידא על כנפי רוח׃
תְהִלִּים י״ח:י״א
ישת חשך סתרו סביבותיו סכתו חשכת מים עבי שחקים׃
תְהִלִּים י״ח:י״ב
מנגה נגדו עביו עברו ברד וגחלי אש׃
תְהִלִּים י״ח:י״ג
וירעם בשמים יהוה ועליון יתן קלו ברד וגחלי אש׃
תְהִלִּים י״ח:י״ד
וישלח חציו ויפיצם וברקים רב ויהמם׃
תְהִלִּים י״ח:ט״ו
ויראו אפיקי מים ויגלו מוסדות תבל מגערתך יהוה מנשמת רוח אפך׃
תְהִלִּים י״ח:ט״ז
ישלח ממרום יקחני ימשני ממים רבים׃
תְהִלִּים י״ח:י״ז
יצילני מאיבי עז ומשנאי כי אמצו ממני׃
תְהִלִּים י״ח:י״ח
יקדמוני ביום אידי ויהי יהוה למשען לי׃
תְהִלִּים י״ח:י״ט
ויוציאני למרחב יחלצני כי חפץ בי׃