God

אפרים כאשר ראיתי לצור שתולה בנוה ואפרים להוציא אל הורג בניו׃

תן להם יהוה מה תתן תן להם רחם משכיל ושדים צמקים׃

כל רעתם בגלגל כי שם שנאתים על רע מעלליהם מביתי אגרשם לא אוסף אהבתם כל שריהם סררים׃

הכה אפרים שרשם יבש פרי בלי יעשון גם כי ילדון והמתי מחמדי בטנם׃

ימאסם אלהי כי לא שמעו לו ויהיו נדדים בגוים׃

חלק לבם עתה יאשמו הוא יערף מזבחותם ישדד מצבותם׃

כי עתה יאמרו אין מלך לנו כי לא יראנו את יהוה והמלך מה יעשה לנו׃

באותי ואסרם ואספו עליהם עמים באסרם לשתי עינתם׃

ואפרים עגלה מלמדה אהבתי לדוש ואני עברתי על טוב צוארה ארכיב אפרים יחרוש יהודה ישדד לו יעקב׃

זרעו לכם לצדקה קצרו לפי חסד נירו לכם ניר ועת לדרוש את יהוה עד יבוא וירה צדק לכם׃

¶ כי נער ישראל ואהבהו וממצרים קראתי לבני׃

ואנכי תרגלתי לאפרים קחם על זרועתיו ולא ידעו כי רפאתים׃

בחבלי אדם אמשכם בעבתות אהבה ואהיה להם כמרימי על על לחיהם ואט אליו אוכיל׃

ועמי תלואים למשובתי ואל על יקראהו יחד לא ירומם׃

איך אתנך אפרים אמגנך ישראל איך אתנך כאדמה אשימך כצבאים נהפך עלי לבי יחד נכמרו נחומי׃

לא אעשה חרון אפי לא אשוב לשחת אפרים כי אל אנכי ולא איש בקרבך קדוש ולא אבוא בעיר׃

אחרי יהוה ילכו כאריה ישאג כי הוא ישאג ויחרדו בנים מים׃

יחרדו כצפור ממצרים וכיונה מארץ אשור והושבתים על בתיהם נאם יהוה׃

סבבני בכחש אפרים ובמרמה בית ישראל ויהודה עד רד עם אל ועם קדושים נאמן׃

וריב ליהוה עם יהודה ולפקד על יעקב כדרכיו כמעלליו ישיב לו׃

בבטן עקב את אחיו ובאונו שרה את אלהים׃

ויהוה אלהי הצבאות יהוה זכרו׃

ואתה באלהיך תשוב חסד ומשפט שמר וקוה אל אלהיך תמיד׃

ואנכי יהוה אלהיך מארץ מצרים עד אושיבך באהלים כימי מועד׃

ודברתי על הנביאים ואנכי חזון הרביתי וביד הנביאים אדמה׃