מִשְׁלֵיכ״ג

זהירות בסעודה עם שליטים

א׳
כי תשב ללחום את מושל בין תבין את אשר לפניך׃
ב׳
ושמת שכין בלעך אם בעל נפש אתה׃
ג׳
אל תתאו למטעמותיו והוא לחם כזבים׃

איוולת רדיפת העושר

ד׳
אל תיגע להעשיר מבינתך חדל׃
ה׳
התעוף עיניך בו ואיננו כי עשה יעשה לו כנפים כנשר ועיף השמים׃

הימנע מן המארח הקמצן והרע

ו׳
אל תלחם את לחם רע עין ואל תתאו למטעמתיו׃
ז׳
כי כמו שער בנפשו כן הוא אכל ושתה יאמר לך ולבו בל עמך׃
ח׳
פתך אכלת תקיאנה ושחת דבריך הנעימים׃

חכמה לקהלים שונים

ט׳
באזני כסיל אל תדבר כי יבוז לשכל מליך׃

כיבוד גבולות והגנת העניים

י׳
אל תסג גבול עולם ובשדי יתומים אל תבא׃
י״א
כי גאלם חזק הוא יריב את ריבם אתך׃

דבקות במוסר

י״ב
הביאה למוסר לבך ואזנך לאמרי דעת׃
י״ג
אל תמנע מנער מוסר כי תכנו בשבט לא ימות׃
י״ד
אתה בשבט תכנו ונפשו משאול תציל׃
ט״ו
בני אם חכם לבך ישמח לבי גם אני׃
ט״ז
ותעלזנה כליותי בדבר שפתיך מישרים׃

אל תקנא בחטאים

י״ז
אל יקנא לבך בחטאים כי אם ביראת יהוה כל היום׃
י״ח
כי אם יש אחרית ותקותך לא תכרת׃

הימנע משכרות ומזללות

י״ט
שמע אתה בני וחכם ואשר בדרך לבך׃
כ׳
אל תהי בסבאי יין בזללי בשר למו׃
כ״א
כי סבא וזולל יורש וקרעים תלביש נומה׃
כ״ב
שמע לאביך זה ילדך ואל תבוז כי זקנה אמך׃
כ״ג
אמת קנה ואל תמכר חכמה ומוסר ובינה׃
כ״ד
גול יגול אבי צדיק יולד חכם וישמח בו׃
כ״ה
ישמח אביך ואמך ותגל יולדתך׃

סכנת הזנות

כ״ו
תנה בני לבך לי ועיניך דרכי תרצנה׃
כ״ז
כי שוחה עמקה זונה ובאר צרה נכריה׃
כ״ח
אף היא כחתף תארב ובוגדים באדם תוסף׃

תיאור אומללותו של השיכור

כ״ט
למי אוי למי אבוי למי מדונים למי שיח למי פצעים חנם למי חכללות עינים׃
ל׳
למאחרים על היין לבאים לחקר ממסך׃
ל״א
אל תרא יין כי יתאדם כי יתן בכיס עינו יתהלך במישרים׃
ל״ב
אחריתו כנחש ישך וכצפעני יפרש׃
ל״ג
עיניך יראו זרות ולבך ידבר תהפכות׃
ל״ד
והיית כשכב בלב ים וכשכב בראש חבל׃
ל״ה
הכוני בל חליתי הלמוני בל ידעתי מתי אקיץ אוסיף אבקשנו עוד׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options