פסוקים על Holy Land: Divided by lot

וידבר יהוה אל משה לאמר׃

אלה שמות האנשים אשר ינחלו לכם את הארץ אלעזר הכהן ויהושע בן נון׃

ונשיא אחד נשיא אחד ממטה תקחו לנחל את הארץ׃

ואלה שמות האנשים למטה יהודה כלב בן יפנה׃

ולמטה בני שמעון שמואל בן עמיהוד׃

למטה בנימן אלידד בן כסלון׃

ולמטה בני דן נשיא בקי בן יגלי׃

לבני יוסף למטה בני מנשה נשיא חניאל בן אפד׃

ולמטה בני אפרים נשיא קמואל בן שפטן׃

ולמטה בני זבולן נשיא אליצפן בן פרנך׃

ולמטה בני יששכר נשיא פלטיאל בן עזן׃

ולמטה בני אשר נשיא אחיהוד בן שלמי׃

ולמטה בני נפתלי נשיא פדהאל בן עמיהוד׃

אלה אשר צוה יהוה לנחל את בני ישראל בארץ כנען׃

ועתה חלק את הארץ הזאת בנחלה לתשעת השבטים וחצי השבט המנשה׃

עמו הראובני והגדי לקחו נחלתם אשר נתן להם משה בעבר הירדן מזרחה כאשר נתן להם משה עבד יהוה׃

מערוער אשר על שפת נחל ארנון והעיר אשר בתוך הנחל וכל המישר מידבא עד דיבון׃

וכל ערי סיחון מלך האמרי אשר מלך בחשבון עד גבול בני עמון׃

והגלעד וגבול הגשורי והמעכתי וכל הר חרמון וכל הבשן עד סלכה׃

כל ממלכות עוג בבשן אשר מלך בעשתרות ובאדרעי הוא נשאר מיתר הרפאים ויכם משה וירשם׃

ולא הורישו בני ישראל את הגשורי ואת המעכתי וישב גשור ומעכת בקרב ישראל עד היום הזה׃

רק לשבט הלוי לא נתן נחלה אשי יהוה אלהי ישראל הוא נחלתו כאשר דבר לו׃