פסוקים על The Christ Jesus

607 פסוקים · 25 היבטים

פסוקי מפתח

סינון לפי ספר
  1. יְשַׁעְיָהוּ נ׳:ב׳

    מדוע באתי ואין איש קראתי ואין עונה הקצור קצרה ידי מפדות ואם אין בי כח להציל הן בגערתי אחריב ים אשים נהרות מדבר תבאש דגתם מאין מים ותמת בצמא׃

  2. יְשַׁעְיָהוּ נ׳:ג׳

    אלביש שמים קדרות ושק אשים כסותם׃

  3. יְשַׁעְיָהוּ נ׳:ד׳

    אדני יהוה נתן לי לשון למודים לדעת לעות את יעף דבר יעיר בבקר בבקר יעיר לי אזן לשמע כלמודים׃

  4. יְשַׁעְיָהוּ נ׳:ה׳

    אדני יהוה פתח לי אזן ואנכי לא מריתי אחור לא נסוגתי׃

  5. יְשַׁעְיָהוּ נ׳:ו׳

    גוי נתתי למכים ולחיי למרטים פני לא הסתרתי מכלמות ורק׃

  6. יְשַׁעְיָהוּ נ׳:ז׳

    ואדני יהוה יעזר לי על כן לא נכלמתי על כן שמתי פני כחלמיש ואדע כי לא אבוש׃

  7. יְשַׁעְיָהוּ נ׳:ח׳

    קרוב מצדיקי מי יריב אתי נעמדה יחד מי בעל משפטי יגש אלי׃

  8. יְשַׁעְיָהוּ נ׳:ט׳

    הן אדני יהוה יעזר לי מי הוא ירשיעני הן כלם כבגד יבלו עש יאכלם׃

  9. יְשַׁעְיָהוּ נ׳:י׳

    מי בכם ירא יהוה שמע בקול עבדו אשר הלך חשכים ואין נגה לו יבטח בשם יהוה וישען באלהיו׃

  10. יְשַׁעְיָהוּ נ׳:י״א

    הן כלכם קדחי אש מאזרי זיקות לכו באור אשכם ובזיקות בערתם מידי היתה זאת לכם למעצבה תשכבון׃

  11. יְשַׁעְיָהוּ נ״ג:א׳

    ¶ מי האמין לשמעתנו וזרוע יהוה על מי נגלתה׃

  12. יְשַׁעְיָהוּ נ״ג:ב׳

    ויעל כיונק לפניו וכשרש מארץ ציה לא תאר לו ולא הדר ונראהו ולא מראה ונחמדהו׃

  13. יְשַׁעְיָהוּ נ״ג:ג׳

    נבזה וחדל אישים איש מכאבות וידוע חלי וכמסתר פנים ממנו נבזה ולא חשבנהו׃

  14. יְשַׁעְיָהוּ נ״ג:ד׳

    אכן חלינו הוא נשא ומכאבינו סבלם ואנחנו חשבנהו נגוע מכה אלהים ומענה׃

  15. יְשַׁעְיָהוּ נ״ג:ז׳

    נגש והוא נענה ולא יפתח פיו כשה לטבח יובל וכרחל לפני גזזיה נאלמה ולא יפתח פיו׃

  16. יְשַׁעְיָהוּ נ״ג:ח׳

    מעצר וממשפט לקח ואת דורו מי ישוחח כי נגזר מארץ חיים מפשע עמי נגע למו׃

  17. יְשַׁעְיָהוּ נ״ג:ט׳

    ויתן את רשעים קברו ואת עשיר במתיו על לא חמס עשה ולא מרמה בפיו׃

  18. יְשַׁעְיָהוּ נ״ג:י׳

    ויהוה חפץ דכאו החלי אם תשים אשם נפשו יראה זרע יאריך ימים וחפץ יהוה בידו יצלח׃

  19. יְשַׁעְיָהוּ נ״ג:י״א

    מעמל נפשו יראה ישבע בדעתו יצדיק צדיק עבדי לרבים ועונתם הוא יסבל׃

  20. יְשַׁעְיָהוּ נ״ג:י״ב

    לכן אחלק לו ברבים ואת עצומים יחלק שלל תחת אשר הערה למות נפשו ואת פשעים נמנה והוא חטא רבים נשא ולפשעים יפגיע׃

  21. יְשַׁעְיָהוּ ס״א:א׳

    ¶ רוח אדני יהוה עלי יען משח יהוה אתי לבשר ענוים שלחני לחבש לנשברי לב לקרא לשבוים דרור ולאסורים פקח קוח׃

  22. יְשַׁעְיָהוּ ס״א:ב׳

    לקרא שנת רצון ליהוה ויום נקם לאלהינו לנחם כל אבלים׃

  23. יְשַׁעְיָהוּ ס״א:ג׳

    לשום לאבלי ציון לתת להם פאר תחת אפר שמן ששון תחת אבל מעטה תהלה תחת רוח כהה וקרא להם אילי הצדק מטע יהוה להתפאר׃

  24. זְכַרְיָה י״ב:ט׳

    והיה ביום ההוא אבקש להשמיד את כל הגוים הבאים על ירושלם׃

  25. זְכַרְיָה י״ב:י׳

    ושפכתי על בית דויד ועל יושב ירושלם רוח חן ותחנונים והביטו אלי את אשר דקרו וספדו עליו כמספד על היחיד והמר עליו כהמר על הבכור׃