פסוקים על Kings

580 פסוקים · 175 היבטים

פסוקי מפתח

2 מְלָכִים ט״ו:י״ב
הוא דבר יהוה אשר דבר אל יהוא לאמר בני רביעים ישבו לך על כסא ישראל ויהי כן׃
2 מְלָכִים ט״ו:י״ג
שלום בן יביש מלך בשנת שלשים ותשע שנה לעזיה מלך יהודה וימלך ירח ימים בשמרון׃
2 מְלָכִים ט״ו:י״ד
ויעל מנחם בן גדי מתרצה ויבא שמרון ויך את שלום בן יביש בשמרון וימיתהו וימלך תחתיו׃
2 מְלָכִים ט״ו:ט״ו
ויתר דברי שלום וקשרו אשר קשר הנם כתבים על ספר דברי הימים למלכי ישראל׃
2 מְלָכִים ט״ו:ט״ז
אז יכה מנחם את תפסח ואת כל אשר בה ואת גבוליה מתרצה כי לא פתח ויך את כל ההרותיה בקע׃
2 מְלָכִים ט״ו:י״ז
בשנת שלשים ותשע שנה לעזריה מלך יהודה מלך מנחם בן גדי על ישראל עשר שנים בשמרון׃
2 מְלָכִים ט״ו:י״ח
ויעש הרע בעיני יהוה לא סר מעל חטאות ירבעם בן נבט אשר החטיא את ישראל כל ימיו׃
2 מְלָכִים ט״ו:י״ט
בא פול מלך אשור על הארץ ויתן מנחם לפול אלף ככר כסף להיות ידיו אתו להחזיק הממלכה בידו׃
2 מְלָכִים ט״ו:כ׳
ויצא מנחם את הכסף על ישראל על כל גבורי החיל לתת למלך אשור חמשים שקלים כסף לאיש אחד וישב מלך אשור ולא עמד שם בארץ׃
2 מְלָכִים ט״ו:כ״א
ויתר דברי מנחם וכל אשר עשה הלוא הם כתובים על ספר דברי הימים למלכי ישראל׃
2 מְלָכִים ט״ו:כ״ב
וישכב מנחם עם אבתיו וימלך פקחיה בנו תחתיו׃
2 מְלָכִים ט״ו:כ״ג
בשנת חמשים שנה לעזריה מלך יהודה מלך פקחיה בן מנחם על ישראל בשמרון שנתים׃
2 מְלָכִים ט״ו:כ״ד
ויעש הרע בעיני יהוה לא סר מחטאות ירבעם בן נבט אשר החטיא את ישראל׃
2 מְלָכִים ט״ו:כ״ה
ויקשר עליו פקח בן רמליהו שלישו ויכהו בשמרון בארמון בית מלך את ארגב ואת האריה ועמו חמשים איש מבני גלעדים וימיתהו וימלך תחתיו׃
2 מְלָכִים ט״ו:כ״ו
ויתר דברי פקחיה וכל אשר עשה הנם כתובים על ספר דברי הימים למלכי ישראל׃
2 מְלָכִים ט״ו:כ״ז
בשנת חמשים ושתים שנה לעזריה מלך יהודה מלך פקח בן רמליהו על ישראל בשמרון עשרים שנה׃
2 מְלָכִים ט״ו:כ״ח
ויעש הרע בעיני יהוה לא סר מן חטאות ירבעם בן נבט אשר החטיא את ישראל׃
2 מְלָכִים ט״ו:כ״ט
בימי פקח מלך ישראל בא תגלת פלאסר מלך אשור ויקח את עיון ואת אבל בית מעכה ואת ינוח ואת קדש ואת חצור ואת הגלעד ואת הגלילה כל ארץ נפתלי ויגלם אשורה׃
2 מְלָכִים ט״ו:ל׳
ויקשר קשר הושע בן אלה על פקח בן רמליהו ויכהו וימיתהו וימלך תחתיו בשנת עשרים ליותם בן עזיה׃
2 מְלָכִים ט״ו:ל״א
ויתר דברי פקח וכל אשר עשה הנם כתובים על ספר דברי הימים למלכי ישראל׃
2 מְלָכִים ט״ו:ל״ב
בשנת שתים לפקח בן רמליהו מלך ישראל מלך יותם בן עזיהו מלך יהודה׃
2 מְלָכִים ט״ו:ל״ג
בן עשרים וחמש שנה היה במלכו ושש עשרה שנה מלך בירושלם ושם אמו ירושא בת צדוק׃
2 מְלָכִים ט״ו:ל״ד
ויעש הישר בעיני יהוה ככל אשר עשה עזיהו אביו עשה׃
2 מְלָכִים ט״ו:ל״ה
רק הבמות לא סרו עוד העם מזבחים ומקטרים בבמות הוא בנה את שער בית יהוה העליון׃
2 מְלָכִים ט״ו:ל״ו
ויתר דברי יותם אשר עשה הלא הם כתובים על ספר דברי הימים למלכי יהודה׃

מציג 251–275 מתוך 580 פסוקים

הקודם 1...9 10 11 12 13...24 הבא