פסוקים על Select Readings

802 פסוקים · 47 היבטים

פסוקי מפתח

סינון לפי ספר
  1. בְּרֵאשִׁית מ״ה:ט׳

    מהרו ועלו אל אבי ואמרתם אליו כה אמר בנך יוסף שמני אלהים לאדון לכל מצרים רדה אלי אל תעמד׃

  2. בְּרֵאשִׁית מ״ה:י׳

    וישבת בארץ גשן והיית קרוב אלי אתה ובניך ובני בניך וצאנך ובקרך וכל אשר לך׃

  3. בְּרֵאשִׁית מ״ה:י״א

    וכלכלתי אתך שם כי עוד חמש שנים רעב פן תורש אתה וביתך וכל אשר לך׃

  4. בְּרֵאשִׁית מ״ה:י״ב

    והנה עיניכם ראות ועיני אחי בנימין כי פי המדבר אליכם׃

  5. בְּרֵאשִׁית מ״ה:י״ג

    והגדתם לאבי את כל כבודי במצרים ואת כל אשר ראיתם ומהרתם והורדתם את אבי הנה׃

  6. בְּרֵאשִׁית מ״ה:י״ד

    ויפל על צוארי בנימן אחיו ויבך ובנימן בכה על צואריו׃

  7. בְּרֵאשִׁית מ״ה:ט״ו

    וינשק לכל אחיו ויבך עליהם ואחרי כן דברו אחיו אתו׃

  8. שְׁמֹות י״ד:ה׳

    ויגד למלך מצרים כי ברח העם ויהפך לבב פרעה ועבדיו אל העם ויאמרו מה זאת עשינו כי שלחנו את ישראל מעבדנו׃

  9. שְׁמֹות י״ד:ו׳

    ויאסר את רכבו ואת עמו לקח עמו׃

  10. שְׁמֹות י״ד:ז׳

    ויקח שש מאות רכב בחור וכל רכב מצרים ושלשם על כלו׃

  11. שְׁמֹות י״ד:ח׳

    ויחזק יהוה את לב פרעה מלך מצרים וירדף אחרי בני ישראל ובני ישראל יצאים ביד רמה׃

  12. שְׁמֹות י״ד:ט׳

    וירדפו מצרים אחריהם וישיגו אותם חנים על הים כל סוס רכב פרעה ופרשיו וחילו על פי החירת לפני בעל צפן׃

  13. שְׁמֹות י״ד:י׳

    ופרעה הקריב וישאו בני ישראל את עיניהם והנה מצרים נסע אחריהם וייראו מאד ויצעקו בני ישראל אל יהוה׃

  14. שְׁמֹות י״ד:י״א

    ויאמרו אל משה המבלי אין קברים במצרים לקחתנו למות במדבר מה זאת עשית לנו להוציאנו ממצרים׃

  15. שְׁמֹות י״ד:י״ב

    הלא זה הדבר אשר דברנו אליך במצרים לאמר חדל ממנו ונעבדה את מצרים כי טוב לנו עבד את מצרים ממתנו במדבר׃

  16. שְׁמֹות י״ד:י״ג

    ויאמר משה אל העם אל תיראו התיצבו וראו את ישועת יהוה אשר יעשה לכם היום כי אשר ראיתם את מצרים היום לא תסיפו לראתם עוד עד עולם׃

  17. שְׁמֹות י״ד:י״ד

    יהוה ילחם לכם ואתם תחרישון׃

  18. שְׁמֹות י״ד:ט״ו

    ויאמר יהוה אל משה מה תצעק אלי דבר אל בני ישראל ויסעו׃

  19. שְׁמֹות י״ד:ט״ז

    ואתה הרם את מטך ונטה את ידך על הים ובקעהו ויבאו בני ישראל בתוך הים ביבשה׃

  20. שְׁמֹות י״ד:י״ז

    ואני הנני מחזק את לב מצרים ויבאו אחריהם ואכבדה בפרעה ובכל חילו ברכבו ובפרשיו׃

  21. שְׁמֹות י״ד:י״ח

    וידעו מצרים כי אני יהוה בהכבדי בפרעה ברכבו ובפרשיו׃

  22. שְׁמֹות י״ד:י״ט

    ויסע מלאך האלהים ההלך לפני מחנה ישראל וילך מאחריהם ויסע עמוד הענן מפניהם ויעמד מאחריהם׃

  23. שְׁמֹות י״ד:כ׳

    ויבא בין מחנה מצרים ובין מחנה ישראל ויהי הענן והחשך ויאר את הלילה ולא קרב זה אל זה כל הלילה׃

  24. שְׁמֹות י״ד:כ״א

    ויט משה את ידו על הים ויולך יהוה את הים ברוח קדים עזה כל הלילה וישם את הים לחרבה ויבקעו המים׃

  25. שְׁמֹות י״ד:כ״ב

    ויבאו בני ישראל בתוך הים ביבשה והמים להם חמה מימינם ומשמאלם׃