פסוקים על Select Readings

יושב בשמים ישחק אדני ילעג למו׃

אז ידבר אלימו באפו ובחרונו יבהלמו׃

ואני נסכתי מלכי על ציון הר קדשי׃

אספרה אל חק יהוה אמר אלי בני אתה אני היום ילדתיך׃

שאל ממני ואתנה גוים נחלתך ואחזתך אפסי ארץ׃

תרעם בשבט ברזל ככלי יוצר תנפצם׃

ועתה מלכים השכילו הוסרו שפטי ארץ׃

עבדו את יהוה ביראה וגילו ברעדה׃

נשקו בר פן יאנף ותאבדו דרך כי יבער כמעט אפו אשרי כל חוסי בו׃

¶ למנצח על הגתית מזמור לדוד יהוה אדנינו מה אדיר שמך בכל הארץ אשר תנה הודך על השמים׃

מפי עוללים וינקים יסדת עז למען צורריך להשבית אויב ומתנקם׃

כי אראה שמיך מעשי אצבעתיך ירח וכוכבים אשר כוננתה׃

מה אנוש כי תזכרנו ובן אדם כי תפקדנו׃

ותחסרהו מעט מאלהים וכבוד והדר תעטרהו׃

תמשילהו במעשי ידיך כל שתה תחת רגליו׃

צנה ואלפים כלם וגם בהמות שדי׃

צפור שמים ודגי הים עבר ארחות ימים׃

יהוה אדנינו מה אדיר שמך בכל הארץ׃

¶ למנצח לעבד יהוה לדוד אשר דבר ליהוה את דברי השירה הזאת ביום הציל יהוה אותו מכף כל איביו ומיד שאול ויאמר ארחמך יהוה חזקי׃

יהוה סלעי ומצודתי ומפלטי אלי צורי אחסה בו מגני וקרן ישעי משגבי׃

מהלל אקרא יהוה ומן איבי אושע׃

אפפוני חבלי מות ונחלי בליעל יבעתוני׃

חבלי שאול סבבוני קדמוני מוקשי מות׃

בצר לי אקרא יהוה ואל אלהי אשוע ישמע מהיכלו קולי ושועתי לפניו תבוא באזניו׃

ותגעש ותרעש הארץ ומוסדי הרים ירגזו ויתגעשו כי חרה לו׃