פסוקים על Riches

הון יסיף רעים רבים ודל מרעהו יפרד׃

פעל אוצרות בלשון שקר הבל נדף מבקשי מות׃

עשיר ברשים ימשול ועבד לוה לאיש מלוה׃

עשק דל להרבות לו נתן לעשיר אך למחסור׃

אל תיגע להעשיר מבינתך חדל׃

התעוף עיניך בו ואיננו כי עשה יעשה לו כנפים כנשר ועיף השמים׃

ידע תדע פני צאנך שית לבך לעדרים׃

כי לא לעולם חסן ואם נזר לדור דור׃

מרבה הונו בנשך ובתרבית לחונן דלים יקבצנו׃

חכם בעיניו איש עשיר ודל מבין יחקרנו׃

איש אמונות רב ברכות ואץ להעשיר לא ינקה׃

נבהל להון איש רע עין ולא ידע כי חסר יבאנו׃

שוא ודבר כזב הרחק ממני ראש ועשר אל תתן לי הטריפני לחם חקי׃

פן אשבע וכחשתי ואמרתי מי יהוה ופן אורש וגנבתי ותפשתי שם אלהי׃

כי לאדם שטוב לפניו נתן חכמה ודעת ושמחה ולחוטא נתן ענין לאסוף ולכנוס לתת לטוב לפני האלהים גם זה הבל ורעות רוח׃

יש אחד ואין שני גם בן ואח אין לו ואין קץ לכל עמלו גם עיניו לא תשבע עשר ולמי אני עמל ומחסר את נפשי מטובה גם זה הבל וענין רע הוא׃

ויתרון ארץ בכל היא מלך לשדה נעבד׃

אהב כסף לא ישבע כסף ומי אהב בהמון לא תבואה גם זה הבל׃

ברבות הטובה רבו אוכליה ומה כשרון לבעליה כי אם ראית עיניו׃

מתוקה שנת העבד אם מעט ואם הרבה יאכל והשבע לעשיר איננו מניח לו לישון׃

יש רעה חולה ראיתי תחת השמש עשר שמור לבעליו לרעתו׃

ואבד העשר ההוא בענין רע והוליד בן ואין בידו מאומה׃

כאשר יצא מבטן אמו ערום ישוב ללכת כשבא ומאומה לא ישא בעמלו שילך בידו׃

וגם זה רעה חולה כל עמת שבא כן ילך ומה יתרון לו שיעמל לרוח׃

גם כל ימיו בחשך יאכל וכעס הרבה וחליו וקצף׃