פסוקים על Parables

ויהי המלך עבר והוא צעק אל המלך ויאמר עבדך יצא בקרב המלחמה והנה איש סר ויבא אלי איש ויאמר שמר את האיש הזה אם הפקד יפקד והיתה נפשך תחת נפשו או ככר כסף תשקול׃

ויהי עבדך עשה הנה והנה והוא איננו ויאמר אליו מלך ישראל כן משפטך אתה חרצת׃

וימהר ויסר את האפר מעל עיניו ויכר אתו מלך ישראל כי מהנבאים הוא׃

ויאמר אליו כה אמר יהוה יען שלחת את איש חרמי מיד והיתה נפשך תחת נפשו ועמך תחת עמו׃

וישלח יהואש מלך ישראל אל אמציהו מלך יהודה לאמר החוח אשר בלבנון שלח אל הארז אשר בלבנון לאמר תנה את בתך לבני לאשה ותעבר חית השדה אשר בלבנון ותרמס את החוח׃

גפן ממצרים תסיע תגרש גוים ותטעה׃

פנית לפניה ותשרש שרשיה ותמלא ארץ׃

כסו הרים צלה וענפיה ארזי אל׃

תשלח קצירה עד ים ואל נהר יונקותיה׃

למה פרצת גדריה וארוה כל עברי דרך׃

יכרסמנה חזיר מיער וזיז שדי ירענה׃

אלהים צבאות שוב נא הבט משמים וראה ופקד גפן זאת׃

וכנה אשר נטעה ימינך ועל בן אמצתה לך׃

שרפה באש כסוחה מגערת פניך יאבדו׃

¶ אשירה נא לידידי שירת דודי לכרמו כרם היה לידידי בקרן בן שמן׃

ויעזקהו ויסקלהו ויטעהו שרק ויבן מגדל בתוכו וגם יקב חצב בו ויקו לעשות ענבים ויעש באשים׃

ועתה יושב ירושלם ואיש יהודה שפטו נא ביני ובין כרמי׃

מה לעשות עוד לכרמי ולא עשיתי בו מדוע קויתי לעשות ענבים ויעש באשים׃

ועתה אודיעה נא אתכם את אשר אני עשה לכרמי הסר משוכתו והיה לבער פרץ גדרו והיה למרמס׃

ואשיתהו בתה לא יזמר ולא יעדר ועלה שמיר ושית ועל העבים אצוה מהמטיר עליו מטר׃

כי כרם יהוה צבאות בית ישראל ואיש יהודה נטע שעשועיו ויקו למשפט והנה משפח לצדקה והנה צעקה׃

ביום ההוא כרם חמד ענו לה׃

אני יהוה נצרה לרגעים אשקנה פן יפקד עליה לילה ויום אצרנה׃

האזינו ושמעו קולי הקשיבו ושמעו אמרתי׃

הכל היום יחרש החרש לזרע יפתח וישדד אדמתו׃