פסוקים על Prayer Under Affliction

הטה יהוה אזנך ושמע פקח יהוה עיניך וראה ושמע את דברי סנחריב אשר שלחו לחרף אלהים חי׃

ועתה יהוה אלהינו הושיענו נא מידו וידעו כל ממלכות הארץ כי אתה יהוה אלהים לבדך׃

אלהינו הלא תשפט בם כי אין בנו כח לפני ההמון הרב הזה הבא עלינו ואנחנו לא נדע מה נעשה כי עליך עינינו׃

ועתה אלהינו האל הגדול הגבור והנורא שומר הברית והחסד אל ימעט לפניך את כל התלאה אשר מצאתנו למלכינו לשרינו ולכהנינו ולנביאנו ולאבתינו ולכל עמך מימי מלכי אשור עד היום הזה׃

הורוני ואני אחריש ומה שגיתי הבינו לי׃

אמר אל אלוה אל תרשיעני הודיעני על מה תריבני׃

כמה לי עונות וחטאות פשעי וחטאתי הדיעני׃

למה פניך תסתיר ותחשבני לאויב לך׃

בלעדי אחזה אתה הרני אם עול פעלתי לא אסיף׃

רבים אמרים מי יראנו טוב נסה עלינו אור פניך יהוה׃

חנני יהוה כי אמלל אני רפאני יהוה כי נבהלו עצמי׃

חננני יהוה ראה עניי משנאי מרוממי משערי מות׃

¶ למה יהוה תעמד ברחוק תעלים לעתות בצרה׃

שמרני כאישון בת עין בצל כנפיך תסתירני׃

מפני רשעים זו שדוני איבי בנפש יקיפו עלי׃

צרות לבבי הרחיבו ממצוקותי הוציאני׃

פדה אלהים את ישראל מכל צרותיו׃

הורני יהוה דרכך ונחני בארח מישור למען שוררי׃

הודיעני יהוה קצי ומדת ימי מה היא אדעה מה חדל אני׃

מכל פשעי הצילני חרפת נבל אל תשימני׃

הסר מעלי נגעך מתגרת ידך אני כליתי׃

שמעה תפלתי יהוה ושועתי האזינה אל דמעתי אל תחרש כי גר אנכי עמך תושב ככל אבותי׃

השע ממני ואבליגה בטרם אלך ואינני׃

¶ למנצח מזמור לדוד בבוא אליו נתן הנביא כאשר בא אל בת שבע חנני אלהים כחסדך כרב רחמיך מחה פשעי׃

תשמיעני ששון ושמחה תגלנה עצמות דכית׃