TRV
מתיו כ״ב:ט״ו-מ״ו
ט״ו
וילכו הפרושים ויתיעצו איך יכשילהו בדבר׃
ט״ז
וישלחו אליו את תלמידיהם עם ההורדוסיים לאמר רבי ידענו כי איש אמת אתה ותורה באמת את דרך אלהים ולא תגור מפני איש כי אינך מכיר פני אדם׃
י״ז
לכן הגידה נא לנו את דעתך הנכון לנו לתת מס אל הקיסר אם לא׃
י״ח
וישוע ידע את רשעתם ויאמר החנפים מה תנסוני׃
י״ט
הראוני את מטבע המס ויביאו לו דינר׃
כ׳
ויאמר אליהם של מי הצורה הזאת והמכתב אשר עליו׃
כ״א
ויאמרו אליו של הקיסר ויאמר אליהם לכן תנו לקיסר את אשר לקיסר ולאלהים את אשר לאלהים׃
כ״ב
וכשמעם את זאת תמהו ויעזבהו וילכו להם׃
כ״ג
ביום ההוא נגשו אליו צדוקים האמרים כי אין תחית המתים וישאלו אתו לאמר׃
כ״ד
רבי הן משה אמר איש כי ימות ובנים אין לו אחיו ייבם את אשתו והקים זרע לאחיו׃
כ״ה
ואתנו היו שבעה אחים והראשון נשא אשה וימת וזרע אין לו ויעזב את אשתו לאחיו׃
כ״ו
וכמו כן גם השני וכן גם השלישי עד השבעה׃
כ״ז
ואחרי כלם מתה גם האשה׃
כ״ח
ועתה בתחית המתים למי מן השבעה תהיה לאשה כי לכלם היתה׃
כ״ט
ויען ישוע ויאמר להם טעים אתם באשר אינכם יודעים את הכתובים וגם את גבורת האלהים׃
ל׳
כי בתחית המתים לא ישאו נשים ולא תנשאנה כי אם כמלאכי אלהים בשמים יהיו׃
ל״א
ועל דבר תחית המתים הלא קראתם את הנאמר לכם מפי האלהים לאמר׃
ל״ב
אנכי אלהי אברהם ואלהי יצחק ואלהי יעקב והוא איננו אלהי המתים כי אם אלהי החיים׃
ל״ג
וישמע המון העם וישתומממו על תורתו׃
ל״ד
והפרושים כשמעם כי סכר פי הצדוקים ויועדו יחדו׃
ל״ה
ואחד מהם מבין בתורה שאל אתו לנסותו לאמר׃
ל״ו
רבי אי זו מצוה גדולה היא בתורה׃
ל״ז
ויאמר ישוע אליו ואהבת את יהוה אלהיך בכל לבבך ובכל נפשך ובכל מדעך׃
ל״ח
זאת היא המצוה הגדולה והראשונה׃
ל״ט
והשנית דומה לה ואהבת לרעך כמוך׃
מ׳
בשתי המצות האלה כל התורה תלויה וגם הנביאים׃
מ״א
ויהי בהקהל הפרושים וישאלם ישוע לאמר׃
מ״ב
מה דעתכם על המשיח בן מי הוא ויאמרו אליו בן דוד׃
מ״ג
ויאמר אליהם ואיך קרא לו דוד ברוח אדון באמרו׃
מ״ד
נאם יהוה לאדני שב לימיני עד אשית איביך הדם לרגליך׃
מ״ה
ועתה אם דוד קרא לו אדון איך הוא בנו׃
מ״ו
ולא יכל איש לענות אתו דבר ולא ערב עוד איש את לבו מן היום ההוא לשאל אותו׃
Settings