פסוקים על War

639 פסוקים · 45 היבטים

פסוקי מפתח

סינון לפי ספר
  1. יִרְמְיָהוּ נ״א:ל״ד

    אכלנו הממנו נבוכדראצר מלך בבל הציגנו כלי ריק בלענו כתנין מלא כרשו מעדני הדיחנו׃

  2. יִרְמְיָהוּ נ״א:ל״ה

    חמסי ושארי על בבל תאמר ישבת ציון ודמי אל ישבי כשדים תאמר ירושלם׃

  3. יִרְמְיָהוּ נ״א:ל״ו

    לכן כה אמר יהוה הנני רב את ריבך ונקמתי את נקמתך והחרבתי את ימה והבשתי את מקורה׃

  4. יִרְמְיָהוּ נ״א:ל״ז

    והיתה בבל לגלים מעון תנים שמה ושרקה מאין יושב׃

  5. יִרְמְיָהוּ נ״א:ל״ח

    יחדו ככפרים ישאגו נערו כגורי אריות׃

  6. יִרְמְיָהוּ נ״א:ל״ט

    בחמם אשית את משתיהם והשכרתים למען יעלזו וישנו שנת עולם ולא יקיצו נאם יהוה׃

  7. יִרְמְיָהוּ נ״א:מ׳

    אורידם ככרים לטבוח כאילים עם עתודים׃

  8. יִרְמְיָהוּ נ״א:מ״א

    איך נלכדה ששך ותתפש תהלת כל הארץ איך היתה לשמה בבל בגוים׃

  9. יִרְמְיָהוּ נ״א:מ״ב

    עלה על בבל הים בהמון גליו נכסתה׃

  10. יִרְמְיָהוּ נ״א:מ״ג

    היו עריה לשמה ארץ ציה וערבה ארץ לא ישב בהן כל איש ולא יעבר בהן בן אדם׃

  11. יִרְמְיָהוּ נ״א:מ״ד

    ופקדתי על בל בבבל והצאתי את בלעו מפיו ולא ינהרו אליו עוד גוים גם חומת בבל נפלה׃

  12. יִרְמְיָהוּ נ״א:מ״ה

    צאו מתוכה עמי ומלטו איש את נפשו מחרון אף יהוה׃

  13. יִרְמְיָהוּ נ״א:מ״ו

    ופן ירך לבבכם ותיראו בשמועה הנשמעת בארץ ובא בשנה השמועה ואחריו בשנה השמועה וחמס בארץ ומשל על משל׃

  14. יִרְמְיָהוּ נ״א:מ״ז

    לכן הנה ימים באים ופקדתי על פסילי בבל וכל ארצה תבוש וכל חלליה יפלו בתוכה׃

  15. יִרְמְיָהוּ נ״א:מ״ח

    ורננו על בבל שמים וארץ וכל אשר בהם כי מצפון יבוא לה השודדים נאם יהוה׃

  16. יִרְמְיָהוּ נ״א:מ״ט

    גם בבל לנפל חללי ישראל גם לבבל נפלו חללי כל הארץ׃

  17. יִרְמְיָהוּ נ״א:נ׳

    פלטים מחרב הלכו אל תעמדו זכרו מרחוק את יהוה וירושלם תעלה על לבבכם׃

  18. יִרְמְיָהוּ נ״א:נ״א

    בשנו כי שמענו חרפה כסתה כלמה פנינו כי באו זרים על מקדשי בית יהוה׃

  19. יִרְמְיָהוּ נ״א:נ״ב

    לכן הנה ימים באים נאם יהוה ופקדתי על פסיליה ובכל ארצה יאנק חלל׃

  20. יִרְמְיָהוּ נ״א:נ״ג

    כי תעלה בבל השמים וכי תבצר מרום עזה מאתי יבאו שדדים לה נאם יהוה׃

  21. יִרְמְיָהוּ נ״א:נ״ד

    קול זעקה מבבל ושבר גדול מארץ כשדים׃

  22. יִרְמְיָהוּ נ״א:נ״ה

    כי שדד יהוה את בבל ואבד ממנה קול גדול והמו גליהם כמים רבים נתן שאון קולם׃

  23. יִרְמְיָהוּ נ״א:נ״ו

    כי בא עליה על בבל שודד ונלכדו גבוריה חתתה קשתותם כי אל גמלות יהוה שלם ישלם׃

  24. יִרְמְיָהוּ נ״א:נ״ז

    והשכרתי שריה וחכמיה פחותיה וסגניה וגבוריה וישנו שנת עולם ולא יקיצו נאם המלך יהוה צבאות שמו׃

  25. יִרְמְיָהוּ נ״א:נ״ח

    כה אמר יהוה צבאות חמות בבל הרחבה ערער תתערער ושעריה הגבהים באש יצתו ויגעו עמים בדי ריק ולאמים בדי אש ויעפו׃