פסוקים על Sin (1)

חטאתי אודיעך ועוני לא כסיתי אמרתי אודה עלי פשעי ליהוה ואתה נשאת עון חטאתי סלה׃

אין מתם בבשרי מפני זעמך אין שלום בעצמי מפני חטאתי׃

כי עונתי עברו ראשי כמשא כבד יכבדו ממני׃

כי עוני אגיד אדאג מחטאתי׃

אתה יהוה לא תכלא רחמיך ממני חסדך ואמתך תמיד יצרוני׃

כי אפפו עלי רעות עד אין מספר השיגוני עונתי ולא יכלתי לראות עצמו משערות ראשי ולבי עזבני׃

אני אמרתי יהוה חנני רפאה נפשי כי חטאתי לך׃

הרבה כבסני מעוני ומחטאתי טהרני׃

כי פשעי אני אדע וחטאתי נגדי תמיד׃

לך לבדך חטאתי והרע בעיניך עשיתי למען תצדק בדברך תזכה בשפטך׃

הן בעוון חוללתי ובחטא יחמתני אמי׃

אלהים אתה ידעת לאולתי ואשמותי ממך לא נכחדו׃

כי יתחמץ לבבי וכליותי אשתונן׃

ואני בער ולא אדע בהמות הייתי עמך׃

וישב עליהם את אונם וברעתם יצמיתם יצמיתם יהוה אלהינו׃

חטאנו עם אבותינו העוינו הרשענו׃

חשבתי דרכי ואשיבה רגלי אל עדתיך׃

חשתי ולא התמהמהתי לשמר מצותיך׃

תעיתי כשה אבד בקש עבדך כי מצותיך לא שכחתי׃

אם עונות תשמר יה אדני מי יעמד׃

יפלו במכמריו רשעים יחד אנכי עד אעבור׃

ויאכלו מפרי דרכם וממעצתיהם ישבעו׃

כבוד חכמים ינחלו וכסילים מרים קלון׃

עוונותיו ילכדנו את הרשע ובחבלי חטאתו יתמך׃

הוא ימות באין מוסר וברב אולתו ישגה׃