פסוקים על Praise

¶ מזמור שיר ליום השבת טוב להדות ליהוה ולזמר לשמך עליון׃

להגיד בבקר חסדך ואמונתך בלילות׃

עלי עשור ועלי נבל עלי הגיון בכנור׃

¶ לכו נרננה ליהוה נריעה לצור ישענו׃

נקדמה פניו בתודה בזמרות נריע לו׃

באו נשתחוה ונכרעה נברכה לפני יהוה עשנו׃

כי הוא אלהינו ואנחנו עם מרעיתו וצאן ידו היום אם בקלו תשמעו׃

¶ שירו ליהוה שיר חדש שירו ליהוה כל הארץ׃

שירו ליהוה ברכו שמו בשרו מיום ליום ישועתו׃

ספרו בגוים כבודו בכל העמים נפלאותיו׃

כי גדול יהוה ומהלל מאד נורא הוא על כל אלהים׃

הוד והדר לפניו עז ותפארת במקדשו׃

הבו ליהוה משפחות עמים הבו ליהוה כבוד ועז׃

הבו ליהוה כבוד שמו שאו מנחה ובאו לחצרותיו׃

השתחוו ליהוה בהדרת קדש חילו מפניו כל הארץ׃

שמחו צדיקים ביהוה והודו לזכר קדשו׃

הריעו ליהוה כל הארץ פצחו ורננו וזמרו׃

זמרו ליהוה בכנור בכנור וקול זמרה׃

בחצצרות וקול שופר הריעו לפני המלך יהוה׃

יודו שמך גדול ונורא קדוש הוא׃

רוממו יהוה אלהינו והשתחוו להדם רגליו קדוש הוא׃

רוממו יהוה אלהינו והשתחוו להר קדשו כי קדוש יהוה אלהינו׃

¶ מזמור לתודה הריעו ליהוה כל הארץ׃

עבדו את יהוה בשמחה באו לפניו ברננה׃

דעו כי יהוה הוא אלהים הוא עשנו ולא אנחנו עמו וצאן מרעיתו׃