פסוקים על Praise: His mercy

ויועץ אל העם ויעמד משררים ליהוה ומהללים להדרת קדש בצאת לפני החלוץ ואמרים הודו ליהוה כי לעולם חסדו׃

¶ משכיל לאיתן האזרחי חסדי יהוה עולם אשירה לדר ודר אודיע אמונתך בפי׃

¶ הודו ליהוה כי טוב כי לעולם חסדו׃

יאמר נא ישראל כי לעולם חסדו׃

יאמרו נא בית אהרן כי לעולם חסדו׃

יאמרו נא יראי יהוה כי לעולם חסדו׃

¶ הודו ליהוה כי טוב כי לעולם חסדו׃

הודו לאלהי האלהים כי לעולם חסדו׃

הודו לאדני האדנים כי לעולם חסדו׃

לעשה נפלאות גדלות לבדו כי לעולם חסדו׃

לעשה השמים בתבונה כי לעולם חסדו׃

לרקע הארץ על המים כי לעולם חסדו׃

לעשה אורים גדלים כי לעולם חסדו׃

את השמש לממשלת ביום כי לעולם חסדו׃

את הירח וכוכבים לממשלות בלילה כי לעולם חסדו׃

למכה מצרים בבכוריהם כי לעולם חסדו׃

ויוצא ישראל מתוכם כי לעולם חסדו׃

ביד חזקה ובזרוע נטויה כי לעולם חסדו׃

לגזר ים סוף לגזרים כי לעולם חסדו׃

והעביר ישראל בתוכו כי לעולם חסדו׃

ונער פרעה וחילו בים סוף כי לעולם חסדו׃

למוליך עמו במדבר כי לעולם חסדו׃

למכה מלכים גדלים כי לעולם חסדו׃

ויהרג מלכים אדירים כי לעולם חסדו׃

לסיחון מלך האמרי כי לעולם חסדו׃