TRV
מתיו כ״ו:ל״ו-נ״ו
ל״ו
אחרי כן בא אתם ישוע אל חצר הנקרא גת שמני ויאמר אל התלמידים שבו לכם פה עד אשר אלך שמה והתפללתי׃
ל״ז
ויקח אתו את פטרוס ואת שני בני זבדי ויחל להעצב ולמוג׃
ל״ח
ויאמר להם נפשי מרה לי עד מות עמדו פה ושקדו עמי׃
ל״ט
וילך מעט האלה ויפל על פניו ויתפלל לאמר אבי אם יוכל להיות תעבר נא מעלי הכוס הזאת אך לא כרצוני כי אם כרצונך׃
מ׳
ויבא אל התלמידים וימצאם ישנים ויאמר אל פטרוס הנה לא היה ביכלתכם לשקד עמי שעה אחת׃
מ״א
שקדו והתפללו פן תבאו לידי נסיון הן הרוח היא חפצה והבשר הוא רפה׃
מ״ב
ויוסף ללכת לו שנית ויתפלל לאמר אבי אם לא תוכל הכוס הזאת לעבר ממני מבלי שתותי אתה יהי כרצונך׃
מ״ג
ויבא וימצאם גם בפעם הזאת ישנים כי עיניהם היו כבדות׃
מ״ד
ויניחם ויוסף ללכת ויתפלל שלישית באמרו עוד הפעם כדבר הזה׃
מ״ה
ויבא אל התלמידים ויאמר אליהם נומו מעתה ונוחו הנה השעה קרובה ובן האדם נמסר לידי חטאים׃
מ״ו
קומו ונלכה הנה הלך וקרב המסר אותי׃
מ״ז
עודנו מדבר והנה בא יהודה אחד משנים העשר ועמו המון רב ברחבות ובמקלות מאת ראשי הכהנים וזקני העם׃
מ״ח
והמסר אתו נתן להם אות לאמר האיש אשר אשקהו זה הוא תפשוהו׃
מ״ט
ומיד נגש אל ישוע ויאמר שלום לך רבי וינשק לו׃
נ׳
ויאמר אליו ישוע רעי על מה באת ויגשו וישלחו את ידיהם בישוע ויתפשו אתו׃
נ״א
והנה אחד מן האנשים אשר עם ישוע שלח ידו וישלף חרבו ויך את עבד הכהן הגדול ויקצץ את אזנו׃
נ״ב
ויאמר אליו ישוע השב את חרבך אל תערה כי כל אחזי חרב בחרב יאבדו׃
נ״ג
או היחשב לבך כי לא יכלתי לשאל עתה מאת אבי והוא יצוה לי יותר משנים עשר לגיונות של מלאכים׃
נ״ד
ואיככה אפוא ימלאו הכתובים כי כן היה תהיה׃
נ״ה
בשעה ההיא אמר ישוע אל המון העם כעל פריץ יצאתם בחרבות ובמקלות לתפשני ויום יום הייתי ישב ומלמד אצלכם במקדש ולא החזקתם בי׃
נ״ו
וכל זאת היתה למלאת כתבי הנביאים אז עזבוהו התלמידים כלם וינוסו׃
Settings