הַבְּשׂוֹרָה הַקְּדוֹשָׁה עַל־פִּי מַתַּי כ״ו:ט״ז-מ׳
ט״ז
ומן העת ההיא בקש תאנה למסר אותו׃
י״ז
ויהי בראשון לחג המצות ויגשו התלמידים אל ישוע לאמר באי זה מקום תחפץ כי נכין לך לאכל את הפסח׃
י״ח
ויאמר לכו העירה אל פלני אלמני ואמרתם אליו כה אמר הרב עתי קרובה היא ובביתך אעשה את הפסח עם תלמידי׃
י״ט
ויעשו התלמידים כאשר צום ישוע ויכינו את הפסח׃
כ׳
ויהי בערב ויסב עם שנים העשר׃
כ״א
ובאכלם ויאמר אמן אמר אני לכם כי אחד מכם ימסרני׃
כ״ב
ויתעצבו מאד ויחלו איש ואיש לאמר לו האנכי הוא אדני׃
כ״ג
ויען ויאמר האיש אשר טבל עמי את ידו בקערה הוא ימסרני׃
כ״ד
הן בן האדם הלוך ילך לו ככתוב עליו אבל אוי לאיש ההוא אשר על ידו ימסר בן האדם טוב לאיש ההוא אם לא נולד׃
כ״ה
ויען יהודה המסר אותו ויאמר רבי האני הוא ויאמר אליו אתה אמרת׃
כ״ו
ובאכלם ויקח ישוע את הלחם ויברך ויבצע ויתן לתלמידים ויאמר קחו ואכלו זה הוא גופי׃
כ״ז
ויקח את הכוס ויברך ויתן להם לאמר שתו ממנה כלכם׃
כ״ח
כי זה הוא דמי דם הברית החדשה הנשפך בעד רבים לסליחת חטאים׃
כ״ט
ואני אמר לכם כי מעתה שתה לא אשתה מתנובת הגפן הזאת עד היום ההוא אשר אשתה אתה עמכם חדשה במלכות אבי׃
ל׳
ויהי אחרי גמרם את ההלל ויצאו אל הר הזיתים׃
ל״א
אז אמר אליהם ישוע אתם כלכם תכשלו בי בלילה הזה כי כתוב אכה את הרעה ותפוצין הצאן׃
ל״ב
ואחרי קומי אלך לפניכם הגלילה׃
ל״ג
ויען פטרוס ויאמר לו גם כי יכשלו בך כלם אני לעולם לא אכשל׃
ל״ד
ויאמר אליו ישוע אמן אמר אני לך כי בלילה הזה בטרם יקרא התרנגול תכחש בי שלש פעמים׃
ל״ה
ויאמר אליו פטרוס גם כי יהיה עלי למות אתך כחש לא אכחש בך וכן אמרו גם כל התלמידים׃
ל״ו
אחרי כן בא אתם ישוע אל חצר הנקרא גת שמני ויאמר אל התלמידים שבו לכם פה עד אשר אלך שמה והתפללתי׃
ל״ז
ויקח אתו את פטרוס ואת שני בני זבדי ויחל להעצב ולמוג׃
ל״ח
ויאמר להם נפשי מרה לי עד מות עמדו פה ושקדו עמי׃
ל״ט
וילך מעט האלה ויפל על פניו ויתפלל לאמר אבי אם יוכל להיות תעבר נא מעלי הכוס הזאת אך לא כרצוני כי אם כרצונך׃
מ׳
ויבא אל התלמידים וימצאם ישנים ויאמר אל פטרוס הנה לא היה ביכלתכם לשקד עמי שעה אחת׃
Settings