TRV
ג'ון י״ב:כ׳-נ׳
כ׳
ובתוך העלים להשתחות בחג היו אנשים יונים׃
כ״א
ויקרבו אל פילפוס איש בית צידה אשר בארץ הגליל וישאלו ממנו לאמר אדני לראות את ישוע חפצנו׃
כ״ב
ויבא פילפוס ויגד זאת אל אנדרי ואנדרי ופילפוס הגידו אל ישוע׃
כ״ג
ויען אותם ישוע ויאמר באה השעה שיפאר בן האדם׃
כ״ד
אמן אמן אני אמר לכם אם לא יפל גרגר החטא אל תוך האדמה ומת ישאר לבדו וכאשר מת יעשה פרי הרבה׃
כ״ה
האהב את נפשו יאבדנה והשנא את נפשו בעולם הזה ינצרה לחיי נצח׃
כ״ו
החפץ לשרתני ילך אחרי ובאשר אהיה שם יהיה גם משרתי ואיש אשר ישרתני אתו יכבד אבי׃
כ״ז
עתה נבהלה נפשי ומה אמר הושיעני אבי מן השעה הזאת אך על כן באתי אל השעה הזאת׃
כ״ח
אבי פאר את שמך ותצא בת קול מן השמים גם פארתי וגם אוסיף לפאר׃
כ״ט
והעם העמדים שמה כשמעם אמרו רעם נשמע ואחרים אמרו מלאך דבר אתו׃
ל׳
ויען ישוע ויאמר לא למעני היה הקול הזה כי אם למענכם׃
ל״א
עתה משפט בא על העולם הזה עתה ישלך שר העולם הזה חוצה׃
ל״ב
ואני בהנשאי מעל הארץ אמשך כלם אלי׃
ל״ג
וזאת דבר לרמוז אי זה מות הוא עתיד למות׃
ל״ד
ויענו אתו העם ויאמרו הנה שמענו בתורה כי המשיח יכון לעולם ואיך אמרת כי בן האדם צריך להנשא ומי בן האדם הלזה׃
ל״ה
ויאמר אליהם ישוע אך למצער יהיה האור עמכם התהלכו בעוד לכם האור פן ישופכם חשך וההלך בחשך לא ידע אנה הוא הלך׃
ל״ו
בעוד לכם האור האמינו באור למען תהיו בני האור את הדברים האלה דבר ישוע וילך לו ויסתר מפניהם׃
ל״ז
רבים האתות אשר עשה לעיניהם ובכל זאת לא האמינו בו׃
ל״ח
למלאת דבר ישעיהו הנביא אשר אמר יהוה מי האמין לשמעתנו וזרוע יהוה על מי נגלתה׃
ל״ט
על כן לא יכלו להאמין כי עוד אמר ישעיהו׃
מ׳
השע עיניהם והשמין לבבם פן יראו בעיניהם ולבבם יבין ושבו ורפאתי להם׃
מ״א
כזאת דבר ישעיהו בראותו את תפארתו וינבא עליו׃
מ״ב
אולם רבים אף מן השרים האמינו בו אך בגלל הפרושים לא הודו למען אשר לא ינדו׃
מ״ג
כי אהבו כבוד אנשים יותר מכבוד האלהים׃
מ״ד
ויקרא ישוע ויאמר המאמין בי לא בי הוא מאמין כי אם בשלח אתי׃
מ״ה
והראה אתי את אשר שלחני הוא ראה׃
מ״ו
אני באתי לאור אל העולם למען כל אשר יאמין בי לא ישב בחשך׃
מ״ז
והשמע את דברי ולא ישמרם אני לא אשפט אתו כי לא באתי לשפט את העולם כי אם להושיע את העולם׃
מ״ח
ואיש אשר יבזני ולא יקח אמרי יש אחד אשר ידין אתו הדבר אשר דברתי הוא ידין אתו ביום האחרון׃
מ״ט
כי אני לא מלבי דברתי כי אם אבי השלח אתי הוא צוני את אשר אמר ואת אשר אדבר׃
נ׳
ואני ידעתי כי מצותו חיי עולם לכן כל אשר אדבר כאשר אמר אלי אבי כן אני מדבר׃
Settings