פסוקים על Idolatry

447 פסוקים · 205 היבטים

פסוקי מפתח

סינון לפי ספר
  1. יְחֶזְקֵאל ח׳:ה׳

    ויאמר אלי בן אדם שא נא עיניך דרך צפונה ואשא עיני דרך צפונה והנה מצפון לשער המזבח סמל הקנאה הזה בבאה׃

  2. יְחֶזְקֵאל ח׳:ו׳

    ויאמר אלי בן אדם הראה אתה מהם עשים תועבות גדלות אשר בית ישראל עשים פה לרחקה מעל מקדשי ועוד תשוב תראה תועבות גדלות׃

  3. יְחֶזְקֵאל ח׳:ז׳

    ויבא אתי אל פתח החצר ואראה והנה חר אחד בקיר׃

  4. יְחֶזְקֵאל ח׳:ח׳

    ויאמר אלי בן אדם חתר נא בקיר ואחתר בקיר והנה פתח אחד׃

  5. יְחֶזְקֵאל ח׳:ט׳

    ויאמר אלי בא וראה את התועבות הרעות אשר הם עשים פה׃

  6. יְחֶזְקֵאל ח׳:י׳

    ואבוא ואראה והנה כל תבנית רמש ובהמה שקץ וכל גלולי בית ישראל מחקה על הקיר סביב סביב׃

  7. יְחֶזְקֵאל ח׳:י״א

    ושבעים איש מזקני בית ישראל ויאזניהו בן שפן עמד בתוכם עמדים לפניהם ואיש מקטרתו בידו ועתר ענן הקטרת עלה׃

  8. יְחֶזְקֵאל ח׳:י״ב

    ויאמר אלי הראית בן אדם אשר זקני בית ישראל עשים בחשך איש בחדרי משכיתו כי אמרים אין יהוה ראה אתנו עזב יהוה את הארץ׃

  9. יְחֶזְקֵאל ח׳:י״ג

    ויאמר אלי עוד תשוב תראה תועבות גדלות אשר המה עשים׃

  10. יְחֶזְקֵאל ח׳:י״ד

    ויבא אתי אל פתח שער בית יהוה אשר אל הצפונה והנה שם הנשים ישבות מבכות את התמוז׃

  11. יְחֶזְקֵאל ח׳:ט״ו

    ויאמר אלי הראית בן אדם עוד תשוב תראה תועבות גדלות מאלה׃

  12. יְחֶזְקֵאל ח׳:ט״ז

    ויבא אתי אל חצר בית יהוה הפנימית והנה פתח היכל יהוה בין האולם ובין המזבח כעשרים וחמשה איש אחריהם אל היכל יהוה ופניהם קדמה והמה משתחויתם קדמה לשמש׃

  13. יְחֶזְקֵאל ח׳:י״ז

    ויאמר אלי הראית בן אדם הנקל לבית יהודה מעשות את התועבות אשר עשו פה כי מלאו את הארץ חמס וישבו להכעיסני והנם שלחים את הזמורה אל אפם׃

  14. יְחֶזְקֵאל ח׳:י״ח

    וגם אני אעשה בחמה לא תחוס עיני ולא אחמל וקראו באזני קול גדול ולא אשמע אותם׃

  15. יְחֶזְקֵאל ט׳:א׳

    ¶ ויקרא באזני קול גדול לאמר קרבו פקדות העיר ואיש כלי משחתו בידו׃

  16. יְחֶזְקֵאל ט׳:ב׳

    והנה ששה אנשים באים מדרך שער העליון אשר מפנה צפונה ואיש כלי מפצו בידו ואיש אחד בתוכם לבש בדים וקסת הספר במתניו ויבאו ויעמדו אצל מזבח הנחשת׃

  17. יְחֶזְקֵאל ט׳:ג׳

    וכבוד אלהי ישראל נעלה מעל הכרוב אשר היה עליו אל מפתן הבית ויקרא אל האיש הלבש הבדים אשר קסת הספר במתניו׃

  18. יְחֶזְקֵאל ט׳:ד׳

    ויאמר יהוה אלו עבר בתוך העיר בתוך ירושלם והתוית תו על מצחות האנשים הנאנחים והנאנקים על כל התועבות הנעשות בתוכה׃

  19. יְחֶזְקֵאל ט׳:ה׳

    ולאלה אמר באזני עברו בעיר אחריו והכו על תחס עיניכם ואל תחמלו׃

  20. יְחֶזְקֵאל ט׳:ו׳

    זקן בחור ובתולה וטף ונשים תהרגו למשחית ועל כל איש אשר עליו התו אל תגשו וממקדשי תחלו ויחלו באנשים הזקנים אשר לפני הבית׃

  21. יְחֶזְקֵאל ט׳:ז׳

    ויאמר אליהם טמאו את הבית ומלאו את החצרות חללים צאו ויצאו והכו בעיר׃

  22. יְחֶזְקֵאל ט׳:ח׳

    ויהי כהכותם ונאשאר אני ואפלה על פני ואזעק ואמר אהה אדני יהוה המשחית אתה את כל שארית ישראל בשפכך את חמתך על ירושלם׃

  23. יְחֶזְקֵאל ט׳:ט׳

    ויאמר אלי עון בית ישראל ויהודה גדול במאד מאד ותמלא הארץ דמים והעיר מלאה מטה כי אמרו עזב יהוה את הארץ ואין יהוה ראה׃

  24. יְחֶזְקֵאל ט׳:י׳

    וגם אני לא תחוס עיני ולא אחמל דרכם בראשם נתתי׃

  25. יְחֶזְקֵאל ט׳:י״א

    והנה האיש לבש הבדים אשר הקסת במתניו משיב דבר לאמר עשיתי כאשר צויתני׃