מִשְׁלֵיכ״ה

אוסף חזקיהו

א׳
גם אלה משלי שלמה אשר העתיקו אנשי חזקיה מלך יהודה׃

כבוד אלוהים וחובת המלך

ב׳
כבד אלהים הסתר דבר וכבד מלכים חקר דבר׃
ג׳
שמים לרום וארץ לעמק ולב מלכים אין חקר׃
ד׳
הגו סיגים מכסף ויצא לצרף כלי׃
ה׳
הגו רשע לפני מלך ויכון בצדק כסאו׃

חכמה בחצר המלכות

ו׳
אל תתהדר לפני מלך ובמקום גדלים אל תעמד׃
ז׳
כי טוב אמר לך עלה הנה מהשפילך לפני נדיב אשר ראו עיניך׃

יישוב סכסוכים בתבונה

ח׳
אל תצא לרב מהר פן מה תעשה באחריתה בהכלים אתך רעך׃
ט׳
ריבך ריב את רעך וסוד אחר אל תגל׃
י׳
פן יחסדך שמע ודבתך לא תשוב׃

ערכן של מילים בעיתן

י״א
תפוחי זהב במשכיות כסף דבר דבר על אפניו׃
י״ב
נזם זהב וחלי כתם מוכיח חכם על אזן שמעת׃
י״ג
כצנת שלג ביום קציר ציר נאמן לשלחיו ונפש אדניו ישיב׃
י״ד
נשיאים ורוח וגשם אין איש מתהלל במתת שקר׃
ט״ו
בארך אפים יפתה קצין ולשון רכה תשבר גרם׃

מתינות וגבולות בין שכנים

ט״ז
דבש מצאת אכל דיך פן תשבענו והקאתו׃
י״ז
הקר רגלך מבית רעך פן ישבעך ושנאך׃
י״ח
מפיץ וחרב וחץ שנון איש ענה ברעהו עד שקר׃
י״ט
שן רעה ורגל מועדת מבטח בוגד ביום צרה׃
כ׳
מעדה בגד ביום קרה חמץ על נתר ושר בשרים על לב רע׃

יחסך לצרך

כ״א
אם רעב שנאך האכלהו לחם ואם צמא השקהו מים׃
כ״ב
כי גחלים אתה חתה על ראשו ויהוה ישלם לך׃

התנהגות ותוצאותיה

כ״ג
רוח צפון תחולל גשם ופנים נזעמים לשון סתר׃
כ״ד
טוב שבת על פנת גג מאשת מדונים ובית חבר׃
כ״ה
מים קרים על נפש עיפה ושמועה טובה מארץ מרחק׃
כ״ו
מעין נרפש ומקור משחת צדיק מט לפני רשע׃
כ״ז
אכל דבש הרבות לא טוב וחקר כבדם כבוד׃
כ״ח
עיר פרוצה אין חומה איש אשר אין מעצר לרוחו׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options