מִשְׁלֵיכ״ד

אל תקנא באנשי רשע

א׳
אל תקנא באנשי רעה ואל תתאו להיות אתם׃
ב׳
כי שד יהגה לבם ועמל שפתיהם תדברנה׃

החכמה בונה ומכוננת

ג׳
בחכמה יבנה בית ובתבונה יתכונן׃
ד׳
ובדעת חדרים ימלאו כל הון יקר ונעים׃
ה׳
גבר חכם בעוז ואיש דעת מאמץ כח׃
ו׳
כי בתחבלות תעשה לך מלחמה ותשועה ברב יועץ׃

איוולת הרשע והעצלות

ז׳
ראמות לאויל חכמות בשער לא יפתח פיהו׃
ח׳
מחשב להרע לו בעל מזמות יקראו׃
ט׳
זמת אולת חטאת ותועבת לאדם לץ׃
י׳
התרפית ביום צרה צר כחכה׃

הצל את המובלים למוות

י״א
הצל לקחים למות ומטים להרג אם תחשוך׃
י״ב
כי תאמר הן לא ידענו זה הלא תכן לבות הוא יבין ונצר נפשך הוא ידע והשיב לאדם כפעלו׃

מתיקות החכמה וגמולה

י״ג
אכל בני דבש כי טוב ונפת מתוק על חכך׃
י״ד
כן דעה חכמה לנפשך אם מצאת ויש אחרית ותקותך לא תכרת׃

עמידת הצדיקים

ט״ו
אל תארב רשע לנוה צדיק אל תשדד רבצו׃
ט״ז
כי שבע יפול צדיק וקם ורשעים יכשלו ברעה׃

אל תשמח בנפול אויבך

י״ז
בנפל אויביך אל תשמח ובכשלו אל יגל לבך׃
י״ח
פן יראה יהוה ורע בעיניו והשיב מעליו אפו׃
י״ט
אל תתחר במרעים אל תקנא ברשעים׃
כ׳
כי לא תהיה אחרית לרע נר רשעים ידעך׃

יראו את האלוהים וכבדו את המלך

כ״א
ירא את יהוה בני ומלך עם שונים אל תתערב׃
כ״ב
כי פתאם יקום אידם ופיד שניהם מי יודע׃

עוד דברי חכמים

כ״ג
גם אלה לחכמים הכר פנים במשפט בל טוב׃
כ״ד
אמר לרשע צדיק אתה יקבהו עמים יזעמוהו לאמים׃
כ״ה
ולמוכיחים ינעם ועליהם תבוא ברכת טוב׃
כ״ו
שפתים ישק משיב דברים נכחים׃
כ״ז
הכן בחוץ מלאכתך ועתדה בשדה לך אחר ובנית ביתך׃
כ״ח
אל תהי עד חנם ברעך והפתית בשפתיך׃
כ״ט
אל תאמר כאשר עשה לי כן אעשה לו אשיב לאיש כפעלו׃

התבוננות בשדה העצל

ל׳
על שדה איש עצל עברתי ועל כרם אדם חסר לב׃
ל״א
והנה עלה כלו קמשנים כסו פניו חרלים וגדר אבניו נהרסה׃
ל״ב
ואחזה אנכי אשית לבי ראיתי לקחתי מוסר׃
ל״ג
מעט שנות מעט תנומות מעט חבק ידים לשכב׃
ל״ד
ובא מתהלך רישך ומחסריך כאיש מגן׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options