TRV
הבְּשׂוֹרָה הַקְּדוֹשָׁה עַל־פִּי לוּקָס כ״ג:א׳-כ״ה
א׳
¶ ויקם כל קהלם ויוליכהו אל פילטוס׃
ב׳
ויחלו לדבר עליו שטנה לאמר את זה מצאנו מסית את העם ומנע אתו מתת מס אל הקיסר באמרו כי הוא מלך המשיח׃
ג׳
וישאלהו פילטוס לאמר האתה הוא מלך היהודים ויען אתו ויאמר אתה אמרת׃
ד׳
ויאמר פילטוס אל ראשי הכהנים ואל המון העם לא מצאתי דבר אשם באיש הזה׃
ה׳
והם התאמצו לדבר מדיח הוא את העם בלמדו בכל יהודה החל מן הגליל ועד הנה׃
ו׳
ויהי כשמע פילטוס את שם הגליל וישאל אם הוא איש גלילי׃
ז׳
וכאשר ידע כי מממשלת הורדוס הוא שלחו אל הורדוס אשר היה גם הוא בירושלים בימים האלה׃
ח׳
וישמח הורדוס עד מאד כראותו את ישוע כי מימים רבים אוה לראת אתו על כי שמע את שמעו ויקו לראת אות אשר יעשה׃
ט׳
וירב לשאל אותו והוא לא השיב אתו דבר׃
י׳
ויעמדו הכהנים הגדולים והסופרים ויתחזקו לדבר עליו שטנה׃
י״א
ויבז אתו הורדוס עם צבאותיו ויהתל בו וילבש אותו בגד זהורית וישלחהו אל פילטוס׃
י״ב
ביום ההוא נהיו פילטוס והורדוס לאהבים יחדו כי מלפנים איבה היתה בינתם׃
י״ג
ויקרא פילטוס את ראשי הכהנים ואת השרים ואת העם׃
י״ד
ויאמר אליהם הבאתם לפני את האיש הזה כמסית את העם והנה אני חקרתיו לעיניכם ולא מצאתי באיש הזה אשמת מאומה מן הדברים אשר אתם טוענים עליו׃
ט״ו
וגם הורדוס לא מצא כי שלחתי אתכם אליו והנה אין בו חטא משפט מות׃
ט״ז
על כן איסרנו ואפטרנו׃
י״ז
ועליו היה לפטר להם איש אחד בימי החג׃
י״ח
ויצעקו כל המונם ויאמרו הסר את זה ופטר לנו את בר אבא׃
י״ט
והוא היה משלך בית האסורים על דבר מרד אשר נהיה בעיר ועל דבר רצח׃
כ׳
ויסף פילטוס לשאת קולו כי חפץ לפטר את ישוע׃
כ״א
והמה צעקו אליו לאמר הצלב אותו הצלב׃
כ״ב
ויאמר אליהם פעם שלישית מה אפוא עשה זה רעה כל אשמת מות לא מצאתי בו על כן איסרנו ואפטרנו׃
כ״ג
ויפצרו בו בקול גדול ויבקשו כי יצלב ויחזק קולם וקול הכהנים הגדולים׃
כ״ד
ויגזר פילטוס כי תעשה בקשתם׃
כ״ה
ויפטר להם את המשלך בית האסורים על דבר מרד ורצח את אשר שאלו ואת ישוע מסר לרצונם׃
Settings