Joseph

ויתן שר בית הסהר ביד יוסף את כל האסירם אשר בבית הסהר ואת כל אשר עשים שם הוא היה עשה׃

ויתן אתם במשמר בית שר הטבחים אל בית הסהר מקום אשר יוסף אסור שם׃

ויפקד שר הטבחים את יוסף אתם וישרת אתם ויהיו ימים במשמר׃

ויבא אליהם יוסף בבקר וירא אתם והנם זעפים׃

ויאמרו אליו חלום חלמנו ופתר אין אתו ויאמר אלהם יוסף הלוא לאלהים פתרנים ספרו נא לי׃

ויספר שר המשקים את חלמו ליוסף ויאמר לו בחלומי והנה גפן לפני׃

ויאמר לו יוסף זה פתרנו שלשת השרגים שלשת ימים הם׃

וירא שר האפים כי טוב פתר ויאמר אל יוסף אף אני בחלומי והנה שלשה סלי חרי על ראשי׃

ויען יוסף ויאמר זה פתרנו שלשת הסלים שלשת ימים הם׃

ואת שר האפים תלה כאשר פתר להם יוסף׃

ולא זכר שר המשקים את יוסף וישכחהו׃

וישלח פרעה ויקרא את יוסף ויריצהו מן הבור ויגלח ויחלף שמלתיו ויבא אל פרעה׃

ויאמר פרעה אל יוסף חלום חלמתי ופתר אין אתו ואני שמעתי עליך לאמר תשמע חלום לפתר אתו׃

ויען יוסף את פרעה לאמר בלעדי אלהים יענה את שלום פרעה׃

וידבר פרעה אל יוסף בחלמי הנני עמד על שפת היאר׃

ויאמר יוסף אל פרעה חלום פרעה אחד הוא את אשר האלהים עשה הגיד לפרעה׃

ויאמר פרעה אל יוסף אחרי הודיע אלהים אותך את כל זאת אין נבון וחכם כמוך׃

ויאמר פרעה אל יוסף ראה נתתי אתך על כל ארץ מצרים׃

ויסר פרעה את טבעתו מעל ידו ויתן אתה על יד יוסף וילבש אתו בגדי שש וישם רבד הזהב על צוארו׃

ויאמר פרעה אל יוסף אני פרעה ובלעדיך לא ירים איש את ידו ואת רגלו בכל ארץ מצרים׃

ויקרא פרעה שם יוסף צפנת פענח ויתן לו את אסנת בת פוטי פרע כהן אן לאשה ויצא יוסף על ארץ מצרים׃

ויוסף בן שלשים שנה בעמדו לפני פרעה מלך מצרים ויצא יוסף מלפני פרעה ויעבר בכל ארץ מצרים׃

ויצבר יוסף בר כחול הים הרבה מאד עד כי חדל לספר כי אין מספר׃

וליוסף ילד שני בנים בטרם תבוא שנת הרעב אשר ילדה לו אסנת בת פוטי פרע כהן און׃

ויקרא יוסף את שם הבכור מנשה כי נשני אלהים את כל עמלי ואת כל בית אבי׃