פסוקים על The Tribes of Israel

ויהי בשכן ישראל בארץ ההוא וילך ראובן וישכב את בלהה פילגש אביו וישמע ישראל ויהיו בני יעקב שנים עשר׃

בני לאה בכור יעקב ראובן ושמעון ולוי ויהודה ויששכר וזבלון׃

בני רחל יוסף ובנימן׃

ובני בלהה שפחת רחל דן ונפתלי׃

ובני זלפה שפחת לאה גד ואשר אלה בני יעקב אשר ילד לו בפדן ארם׃

ועתה שני בניך הנולדים לך בארץ מצרים עד באי אליך מצרימה לי הם אפרים ומנשה כראובן ושמעון יהיו לי׃

ראובן בכרי אתה כחי וראשית אוני יתר שאת ויתר עז׃

פחז כמים אל תותר כי עלית משכבי אביך אז חללת יצועי עלה׃

שמעון ולוי אחים כלי חמס מכרתיהם׃

בסדם אל תבא נפשי בקהלם אל תחד כבדי כי באפם הרגו איש וברצנם עקרו שור׃

ארור אפם כי עז ועברתם כי קשתה אחלקם ביעקב ואפיצם בישראל׃

יהודה אתה יודוך אחיך ידך בערף איביך ישתחוו לך בני אביך׃

גור אריה יהודה מטרף בני עלית כרע רבץ כאריה וכלביא מי יקימנו׃

לא יסור שבט מיהודה ומחקק מבין רגליו עד כי יבא שילה ולו יקהת עמים׃

אסרי לגפן עירה ולשרקה בני אתנו כבס ביין לבשו ובדם ענבים סותה׃

חכלילי עינים מיין ולבן שנים מחלב׃

זבולן לחוף ימים ישכן והוא לחוף אניות וירכתו על צידן׃

יששכר חמר גרם רבץ בין המשפתים׃

וירא מנחה כי טוב ואת הארץ כי נעמה ויט שכמו לסבל ויהי למס עבד׃

דן ידין עמו כאחד שבטי ישראל׃

יהי דן נחש עלי דרך שפיפן עלי ארח הנשך עקבי סוס ויפל רכבו אחור׃

לישועתך קויתי יהוה׃

גד גדוד יגודנו והוא יגד עקב׃

מאשר שמנה לחמו והוא יתן מעדני מלך׃

נפתלי אילה שלחה הנתן אמרי שפר׃