עברית

God

11,427 פסוקים · 2 בני משפחה

פסוקים המזכירים את God

סינון לפי ספר
  1. יְהוֹשֻעַ כ״ג:י׳

    איש אחד מכם ירדף אלף כי יהוה אלהיכם הוא הנלחם לכם כאשר דבר לכם׃

  2. יְהוֹשֻעַ כ״ג:י״א

    ונשמרתם מאד לנפשתיכם לאהבה את יהוה אלהיכם׃

  3. יְהוֹשֻעַ כ״ג:י״ג

    ידוע תדעו כי לא יוסיף יהוה אלהיכם להוריש את הגוים האלה מלפניכם והיו לכם לפח ולמוקש ולשטט בצדיכם ולצננים בעיניכם עד אבדכם מעל האדמה הטובה הזאת אשר נתן לכם יהוה אלהיכם׃

  4. יְהוֹשֻעַ כ״ג:י״ד

    והנה אנכי הולך היום בדרך כל הארץ וידעתם בכל לבבכם ובכל נפשכם כי לא נפל דבר אחד מכל הדברים הטובים אשר דבר יהוה אלהיכם עליכם הכל באו לכם לא נפל ממנו דבר אחד׃

  5. יְהוֹשֻעַ כ״ג:ט״ו

    והיה כאשר בא עליכם כל הדבר הטוב אשר דבר יהוה אלהיכם אליכם כן יביא יהוה עליכם את כל הדבר הרע עד השמידו אותכם מעל האדמה הטובה הזאת אשר נתן לכם יהוה אלהיכם׃

  6. יְהוֹשֻעַ כ״ג:ט״ז

    בעברכם את ברית יהוה אלהיכם אשר צוה אתכם והלכתם ועבדתם אלהים אחרים והשתחויתם להם וחרה אף יהוה בכם ואבדתם מהרה מעל הארץ הטובה אשר נתן לכם׃

  7. יְהוֹשֻעַ כ״ד:א׳

    ¶ ויאסף יהושע את כל שבטי ישראל שכמה ויקרא לזקני ישראל ולראשיו ולשפטיו ולשטריו ויתיצבו לפני האלהים׃

  8. יְהוֹשֻעַ כ״ד:ב׳

    ויאמר יהושע אל כל העם כה אמר יהוה אלהי ישראל בעבר הנהר ישבו אבותיכם מעולם תרח אבי אברהם ואבי נחור ויעבדו אלהים אחרים׃

  9. יְהוֹשֻעַ כ״ד:ג׳

    ואקח את אביכם את אברהם מעבר הנהר ואולך אותו בכל ארץ כנען וארב את זרעו ואתן לו את יצחק׃

  10. יְהוֹשֻעַ כ״ד:ד׳

    ואתן ליצחק את יעקב ואת עשו ואתן לעשו את הר שעיר לרשת אותו ויעקב ובניו ירדו מצרים׃

  11. יְהוֹשֻעַ כ״ד:ה׳

    ואשלח את משה ואת אהרן ואגף את מצרים כאשר עשיתי בקרבו ואחר הוצאתי אתכם׃

  12. יְהוֹשֻעַ כ״ד:ו׳

    ואוציא את אבותיכם ממצרים ותבאו הימה וירדפו מצרים אחרי אבותיכם ברכב ובפרשים ים סוף׃

  13. יְהוֹשֻעַ כ״ד:ז׳

    ויצעקו אל יהוה וישם מאפל ביניכם ובין המצרים ויבא עליו את הים ויכסהו ותראינה עיניכם את אשר עשיתי במצרים ותשבו במדבר ימים רבים׃

  14. יְהוֹשֻעַ כ״ד:ח׳

    ואביאה אתכם אל ארץ האמרי היושב בעבר הירדן וילחמו אתכם ואתן אותם בידכם ותירשו את ארצם ואשמידם מפניכם׃

  15. יְהוֹשֻעַ כ״ד:י׳

    ולא אביתי לשמע לבלעם ויברך ברוך אתכם ואצל אתכם מידו׃

  16. יְהוֹשֻעַ כ״ד:י״א

    ותעברו את הירדן ותבאו אל יריחו וילחמו בכם בעלי יריחו האמרי והפרזי והכנעני והחתי והגרגשי החוי והיבוסי ואתן אותם בידכם׃

  17. יְהוֹשֻעַ כ״ד:י״ב

    ואשלח לפניכם את הצרעה ותגרש אותם מפניכם שני מלכי האמרי לא בחרבך ולא בקשתך׃

  18. יְהוֹשֻעַ כ״ד:י״ג

    ואתן לכם ארץ אשר לא יגעת בה וערים אשר לא בניתם ותשבו בהם כרמים וזיתים אשר לא נטעתם אתם אכלים׃

  19. יְהוֹשֻעַ כ״ד:י״ד

    ועתה יראו את יהוה ועבדו אתו בתמים ובאמת והסירו את אלהים אשר עבדו אבותיכם בעבר הנהר ובמצרים ועבדו את יהוה׃

  20. יְהוֹשֻעַ כ״ד:ט״ו

    ואם רע בעיניכם לעבד את יהוה בחרו לכם היום את מי תעבדון אם את אלהים אשר עבדו אבותיכם אשר בעבר הנהר ואם את אלהי האמרי אשר אתם ישבים בארצם ואנכי וביתי נעבד את יהוה׃

  21. יְהוֹשֻעַ כ״ד:ט״ז

    ויען העם ויאמר חלילה לנו מעזב את יהוה לעבד אלהים אחרים׃

  22. יְהוֹשֻעַ כ״ד:י״ז

    כי יהוה אלהינו הוא המעלה אתנו ואת אבותינו מארץ מצרים מבית עבדים ואשר עשה לעינינו את האתות הגדלות האלה וישמרנו בכל הדרך אשר הלכנו בה ובכל העמים אשר עברנו בקרבם׃

  23. יְהוֹשֻעַ כ״ד:י״ח

    ויגרש יהוה את כל העמים ואת האמרי ישב הארץ מפנינו גם אנחנו נעבד את יהוה כי הוא אלהינו׃

  24. יְהוֹשֻעַ כ״ד:י״ט

    ויאמר יהושע אל העם לא תוכלו לעבד את יהוה כי אלהים קדשים הוא אל קנוא הוא לא ישא לפשעכם ולחטאותיכם׃

  25. יְהוֹשֻעַ כ״ד:כ׳

    כי תעזבו את יהוה ועבדתם אלהי נכר ושב והרע לכם וכלה אתכם אחרי אשר היטיב לכם׃