God

הזאת חשבת למשפט אמרת צדקי מאל׃

אם חטאת מה תפעל בו ורבו פשעיך מה תעשה לו׃

אם צדקת מה תתן לו או מה מידך יקח׃

ולא אמר איה אלוה עשי נתן זמרות בלילה׃

אך שוא לא ישמע אל ושדי לא ישורנה׃

אף כי תאמר לא תשורנו דין לפניו ותחולל לו׃

ועתה כי אין פקד אפו ולא ידע בפש מאד׃

כתר לי זעיר ואחוך כי עוד לאלוה מלים׃

כי אמנם לא שקר מלי תמים דעות עמך׃

הן אל כביר ולא ימאס כביר כח לב׃

לא יגרע מצדיק עיניו ואת מלכים לכסא וישיבם לנצח ויגבהו׃

ויגד להם פעלם ופשעיהם כי יתגברו׃

אם ישמעו ויעבדו יכלו ימיהם בטוב ושניהם בנעימים׃

וחנפי לב ישימו אף לא ישועו כי אסרם׃

ואף הסיתך מפי צר רחב לא מוצק תחתיה ונחת שלחנך מלא דשן׃

כי חמה פן יסיתך בספק ורב כפר אל יטך׃

היערך שועך לא בצר וכל מאמצי כח׃

הן אל ישגיב בכחו מי כמהו מורה׃

מי פקד עליו דרכו ומי אמר פעלת עולה׃

זכר כי תשגיא פעלו אשר שררו אנשים׃

הן אל שגיא ולא נדע מספר שניו ולא חקר׃

כי יגרע נטפי מים יזקו מטר לאדו׃

אף אם יבין מפרשי עב תשאות סכתו׃

הן פרש עליו אורו ושרשי הים כסה׃

כי בם ידין עמים יתן אכל למכביר׃