TRV
God
פסוקים המזכירים את God
ויצא שם דויד בכל הארצות ויהוה נתן את פחדו על כל הגוים׃
¶ ויעש לו בתים בעיר דויד ויכן מקום לארון האלהים ויט לו אהל׃
אז אמר דויד לא לשאת את ארון האלהים כי אם הלוים כי בם בחר יהוה לשאת את ארון יהוה ולשרתו עד עולם׃
ויקהל דויד את כל ישראל אל ירושלם להעלות את ארון יהוה אל מקומו אשר הכין לו׃
ויאמר להם אתם ראשי האבות ללוים התקדשו אתם ואחיכם והעליתם את ארון יהוה אלהי ישראל אל הכינותי לו׃
כי למבראשונה לא אתם פרץ יהוה אלהינו בנו כי לא דרשנהו כמשפט׃
ויתקדשו הכהנים והלוים להעלות את ארון יהוה אלהי ישראל׃
וישאו בני הלוים את ארון האלהים כאשר צוה משה כדבר יהוה בכתפם במטות עליהם׃
ושבניהו ויושפט ונתנאל ועמשי וזכריהו ובניהו ואליעזר הכהנים מחצצרים בחצצרות לפני ארון האלהים ועבד אדם ויחיה שערים לארון׃
ויהי דויד וזקני ישראל ושרי האלפים ההלכים להעלות את ארון ברית יהוה מן בית עבד אדם בשמחה׃
ויהי בעזר האלהים את הלוים נשאי ארון ברית יהוה ויזבחו שבעה פרים ושבעה אילים׃
וכל ישראל מעלים את ארון ברית יהוה בתרועה ובקול שופר ובחצצרות ובמצלתים משמעים בנבלים וכנרות׃
ויהי ארון ברית יהוה בא עד עיר דויד ומיכל בת שאול נשקפה בעד החלון ותרא את המלך דויד מרקד ומשחק ותבז לו בלבה׃
¶ ויביאו את ארון האלהים ויציגו אתו בתוך האהל אשר נטה לו דויד ויקריבו עלות ושלמים לפני האלהים׃
ויכל דויד מהעלות העלה והשלמים ויברך את העם בשם יהוה׃
ויתן לפני ארון יהוה מן הלוים משרתים ולהזכיר ולהודות ולהלל ליהוה אלהי ישראל׃
ובניהו ויחזיאל הכהנים בחצצרות תמיד לפני ארון ברית האלהים׃
ביום ההוא אז נתן דויד בראש להדות ליהוה ביד אסף ואחיו׃
הודו ליהוה קראו בשמו הודיעו בעמים עלילתיו׃
שירו לו זמרו לו שיחו בכל נפלאתיו׃
התהללו בשם קדשו ישמח לב מבקשי יהוה׃
דרשו יהוה ועזו בקשו פניו תמיד׃
זכרו נפלאתיו אשר עשה מפתיו ומשפטי פיהו׃
זרע ישראל עבדו בני יעקב בחיריו׃
הוא יהוה אלהינו בכל הארץ משפטיו׃