TRV
מתיו כ״ד:ד׳-כ״ח
ד׳
ויען ישוע ויאמר להם ראו פן יתעה אתכם איש׃
ה׳
כי רבים יבאו בשמי לאמר אני הוא המשיח והתעו רבים׃
ו׳
ואתם עתידים לשמע מלחמות ושמעות מלחמה ראו פן תבהלו כי היו תהיה כל זאת אך עדן אין הקץ׃
ז׳
כי יקום גוי על גוי וממלכה על ממלכה והיה רעב ודבר ורעש הנה והנה׃
ח׳
וכל אלה רק ראשית החבלים׃
ט׳
אז ימסרו אתכם לעני והמיתו אתכם והייתם שנואים לכל הגוים למען שמי׃
י׳
ואז יכשלו רבים ומסרו איש את רעהו ושנאו איש את אחיו׃
י״א
ונביאי שקר רבים יקומו והתעו רבים׃
י״ב
ומפני אשר ירבה הרשע תפוג אהבת רבים׃
י״ג
והמחכה עד עת קץ הוא יושע׃
י״ד
ותקרא בשורת המלכות הזאת בתבל כלה לעדות לכל הגוים ואחר יבוא הקץ׃
ט״ו
לכן כאשר תראו שקוץ משמם האמור על ידי דניאל הנביא עומד במקום קדש הקרא יבין׃
ט״ז
אז נוס ינוסו אנשי יהודה אל ההרים׃
י״ז
ואשר על הגג אל ירד לשאת דבר מביתו׃
י״ח
ואשר בשדה אל ישב הביתה לשאת את מלבושו׃
י״ט
ואוי להרות ולמיניקות בימים ההם׃
כ׳
אך התפללו אשר מנוסתכם לא תהיה בחרף ולא בשבת׃
כ״א
כי אז תהיה צרה גדולה אשר כמוה לא נהיתה מראשית העולם עד עתה וכמוה לא תהיה עוד׃
כ״ב
ולולא נקצרו הימים ההם לא יושע כל בשר אך למען הבחירים יקצרו הימים ההם׃
כ״ג
וכי יאמר אליכם איש בעת ההיא הנה פה המשיח או הנו שם אל תאמינו׃
כ״ד
כי יקומו משיחי שקר ונביאי שקר ויתנו אתות גדלות ומופתים למען התעות אף את הבחירים אם יוכלו׃
כ״ה
הנה מראש הגדתי לכם׃
כ״ו
לכן כי יאמרו אליכם הנו במדבר אל תצאו הנו בחדרים אל תאמינו׃
כ״ז
כי כברק היוצא ממזרח ומאיר עד מערב כן יהיה גם בואו של בן האדם׃
כ״ח
כי באשר החלל שם יקבצו הנשרים׃
Settings