בְּרֵאשִׁית י״ט:י״ז-ל״ו

י״ז

ויהי כהוציאם אתם החוצה ויאמר המלט על נפשך אל תביט אחריך ואל תעמד בכל הככר ההרה המלט פן תספה׃

י״ח

ויאמר לוט אלהם אל נא אדני׃

י״ט

הנה נא מצא עבדך חן בעיניך ותגדל חסדך אשר עשית עמדי להחיות את נפשי ואנכי לא אוכל להמלט ההרה פן תדבקני הרעה ומתי׃

כ׳

הנה נא העיר הזאת קרבה לנוס שמה והיא מצער אמלטה נא שמה הלא מצער הוא ותחי נפשי׃

כ״א

ויאמר אליו הנה נשאתי פניך גם לדבר הזה לבלתי הפכי את העיר אשר דברת׃

כ״ב

מהר המלט שמה כי לא אוכל לעשות דבר עד באך שמה על כן קרא שם העיר צוער׃

כ״ג

השמש יצא על הארץ ולוט בא צערה׃

כ״ד

ויהוה המטיר על סדם ועל עמרה גפרית ואש מאת יהוה מן השמים׃

כ״ה

ויהפך את הערים האל ואת כל הככר ואת כל ישבי הערים וצמח האדמה׃

כ״ו

ותבט אשתו מאחריו ותהי נציב מלח׃

כ״ז

וישכם אברהם בבקר אל המקום אשר עמד שם את פני יהוה׃

כ״ח

וישקף על פני סדם ועמרה ועל כל פני ארץ הככר וירא והנה עלה קיטר הארץ כקיטר הכבשן׃

כ״ט

ויהי בשחת אלהים את ערי הככר ויזכר אלהים את אברהם וישלח את לוט מתוך ההפכה בהפך את הערים אשר ישב בהן לוט׃

ל׳

ויעל לוט מצוער וישב בהר ושתי בנתיו עמו כי ירא לשבת בצוער וישב במערה הוא ושתי בנתיו׃

ל״א

ותאמר הבכירה אל הצעירה אבינו זקן ואיש אין בארץ לבוא עלינו כדרך כל הארץ׃

ל״ב

לכה נשקה את אבינו יין ונשכבה עמו ונחיה מאבינו זרע׃

ל״ג

ותשקין את אביהן יין בלילה הוא ותבא הבכירה ותשכב את אביה ולא ידע בשכבה ובקומה׃

ל״ד

ויהי ממחרת ותאמר הבכירה אל הצעירה הן שכבתי אמש את אבי נשקנו יין גם הלילה ובאי שכבי עמו ונחיה מאבינו זרע׃

ל״ה

ותשקין גם בלילה ההוא את אביהן יין ותקם הצעירה ותשכב עמו ולא ידע בשכבה ובקמה׃

ל״ו

ותהרין שתי בנות לוט מאביהן׃

נוסח המקרא: Hebrew Bible: the Masoretic text, unpointed (Old Testament); Franz Delitzsch's Hebrew translation (New Testament) · נחלת הכלל