פסוקים על Trumpet

139 פסוקים · 46 היבטים

פסוקי מפתח

סינון לפי ספר
  1. יְהוֹשֻעַ ו׳:ו׳

    ויקרא יהושע בן נון אל הכהנים ויאמר אלהם שאו את ארון הברית ושבעה כהנים ישאו שבעה שופרות יובלים לפני ארון יהוה׃

  2. יְהוֹשֻעַ ו׳:ז׳

    ויאמרו אל העם עברו וסבו את העיר והחלוץ יעבר לפני ארון יהוה׃

  3. יְהוֹשֻעַ ו׳:ח׳

    ויהי כאמר יהושע אל העם ושבעה הכהנים נשאים שבעה שופרות היובלים לפני יהוה עברו ותקעו בשופרות וארון ברית יהוה הלך אחריהם׃

  4. יְהוֹשֻעַ ו׳:ט׳

    והחלוץ הלך לפני הכהנים תקעו השופרות והמאסף הלך אחרי הארון הלוך ותקוע בשופרות׃

  5. יְהוֹשֻעַ ו׳:י׳

    ואת העם צוה יהושע לאמר לא תריעו ולא תשמיעו את קולכם ולא יצא מפיכם דבר עד יום אמרי אליכם הריעו והריעתם׃

  6. יְהוֹשֻעַ ו׳:י״א

    ויסב ארון יהוה את העיר הקף פעם אחת ויבאו המחנה וילינו במחנה׃

  7. יְהוֹשֻעַ ו׳:י״ב

    וישכם יהושע בבקר וישאו הכהנים את ארון יהוה׃

  8. יְהוֹשֻעַ ו׳:י״ג

    ושבעה הכהנים נשאים שבעה שופרות היבלים לפני ארון יהוה הלכים הלוך ותקעו בשופרות והחלוץ הלך לפניהם והמאסף הלך אחרי ארון יהוה הולך ותקוע בשופרות׃

  9. יְהוֹשֻעַ ו׳:י״ד

    ויסבו את העיר ביום השני פעם אחת וישבו המחנה כה עשו ששת ימים׃

  10. יְהוֹשֻעַ ו׳:ט״ו

    ויהי ביום השביעי וישכמו כעלות השחר ויסבו את העיר כמשפט הזה שבע פעמים רק ביום ההוא סבבו את העיר שבע פעמים׃

  11. יְהוֹשֻעַ ו׳:ט״ז

    ויהי בפעם השביעית תקעו הכהנים בשופרות ויאמר יהושע אל העם הריעו כי נתן יהוה לכם את העיר׃

  12. יְהוֹשֻעַ ו׳:י״ז

    והיתה העיר חרם היא וכל אשר בה ליהוה רק רחב הזונה תחיה היא וכל אשר אתה בבית כי החבאתה את המלאכים אשר שלחנו׃

  13. יְהוֹשֻעַ ו׳:י״ח

    ורק אתם שמרו מן החרם פן תחרימו ולקחתם מן החרם ושמתם את מחנה ישראל לחרם ועכרתם אותו׃

  14. יְהוֹשֻעַ ו׳:י״ט

    וכל כסף וזהב וכלי נחשת וברזל קדש הוא ליהוה אוצר יהוה יבוא׃

  15. יְהוֹשֻעַ ו׳:כ׳

    וירע העם ויתקעו בשפרות ויהי כשמע העם את קול השופר ויריעו העם תרועה גדולה ותפל החומה תחתיה ויעל העם העירה איש נגדו וילכדו את העיר׃

  16. שֹׁפְטִים ג׳:כ״ז

    ויהי בבואו ויתקע בשופר בהר אפרים וירדו עמו בני ישראל מן ההר והוא לפניהם׃

  17. שֹׁפְטִים ז׳:ח׳

    ויקחו את צדה העם בידם ואת שופרתיהם ואת כל איש ישראל שלח איש לאהליו ובשלש מאות האיש החזיק ומחנה מדין היה לו מתחת בעמק׃

  18. שֹׁפְטִים ז׳:ט׳

    ויהי בלילה ההוא ויאמר אליו יהוה קום רד במחנה כי נתתיו בידך׃

  19. שֹׁפְטִים ז׳:י׳

    ואם ירא אתה לרדת רד אתה ופרה נערך אל המחנה׃

  20. שֹׁפְטִים ז׳:י״א

    ושמעת מה ידברו ואחר תחזקנה ידיך וירדת במחנה וירד הוא ופרה נערו אל קצה החמשים אשר במחנה׃

  21. שֹׁפְטִים ז׳:י״ב

    ומדין ועמלק וכל בני קדם נפלים בעמק כארבה לרב ולגמליהם אין מספר כחול שעל שפת הים לרב׃

  22. שֹׁפְטִים ז׳:י״ג

    ויבא גדעון והנה איש מספר לרעהו חלום ויאמר הנה חלום חלמתי והנה צלול לחם שערים מתהפך במחנה מדין ויבא עד האהל ויכהו ויפל ויהפכהו למעלה ונפל האהל׃

  23. שֹׁפְטִים ז׳:י״ד

    ויען רעהו ויאמר אין זאת בלתי אם חרב גדעון בן יואש איש ישראל נתן האלהים בידו את מדין ואת כל המחנה׃

  24. שֹׁפְטִים ז׳:ט״ו

    ויהי כשמע גדעון את מספר החלום ואת שברו וישתחו וישב אל מחנה ישראל ויאמר קומו כי נתן יהוה בידכם את מחנה מדין׃

  25. שֹׁפְטִים ז׳:ט״ז

    ויחץ את שלש מאות האיש שלשה ראשים ויתן שופרות ביד כלם וכדים רקים ולפדים בתוך הכדים׃