פסוקים על Jabin

16 פסוקים · 1 היבט

פסוקי מפתח

יְהוֹשֻעַ י״א:א׳
¶ ויהי כשמע יבין מלך חצור וישלח אל יובב מלך מדון ואל מלך שמרון ואל מלך אכשף׃
יְהוֹשֻעַ י״א:ב׳
ואל המלכים אשר מצפון בהר ובערבה נגב כנרות ובשפלה ובנפות דור מים׃
יְהוֹשֻעַ י״א:ג׳
הכנעני ממזרח ומים והאמרי והחתי והפרזי והיבוסי בהר והחוי תחת חרמון בארץ המצפה׃
יְהוֹשֻעַ י״א:ד׳
ויצאו הם וכל מחניהם עמם עם רב כחול אשר על שפת הים לרב וסוס ורכב רב מאד׃
יְהוֹשֻעַ י״א:ה׳
ויועדו כל המלכים האלה ויבאו ויחנו יחדו אל מי מרום להלחם עם ישראל׃
יְהוֹשֻעַ י״א:ו׳
ויאמר יהוה אל יהושע אל תירא מפניהם כי מחר כעת הזאת אנכי נתן את כלם חללים לפני ישראל את סוסיהם תעקר ואת מרכבתיהם תשרף באש׃
יְהוֹשֻעַ י״א:ז׳
ויבא יהושע וכל עם המלחמה עמו עליהם על מי מרום פתאם ויפלו בהם׃
יְהוֹשֻעַ י״א:ח׳
ויתנם יהוה ביד ישראל ויכום וירדפום עד צידון רבה ועד משרפות מים ועד בקעת מצפה מזרחה ויכם עד בלתי השאיר להם שריד׃
יְהוֹשֻעַ י״א:ט׳
ויעש להם יהושע כאשר אמר לו יהוה את סוסיהם עקר ואת מרכבתיהם שרף באש׃
יְהוֹשֻעַ י״א:י׳
וישב יהושע בעת ההיא וילכד את חצור ואת מלכה הכה בחרב כי חצור לפנים היא ראש כל הממלכות האלה׃
יְהוֹשֻעַ י״א:י״א
ויכו את כל הנפש אשר בה לפי חרב החרם לא נותר כל נשמה ואת חצור שרף באש׃
יְהוֹשֻעַ י״א:י״ב
ואת כל ערי המלכים האלה ואת כל מלכיהם לכד יהושע ויכם לפי חרב החרים אותם כאשר צוה משה עבד יהוה׃
יְהוֹשֻעַ י״א:י״ג
רק כל הערים העמדות על תלם לא שרפם ישראל זולתי את חצור לבדה שרף יהושע׃
יְהוֹשֻעַ י״א:י״ד
וכל שלל הערים האלה והבהמה בזזו להם בני ישראל רק את כל האדם הכו לפי חרב עד השמדם אותם לא השאירו כל נשמה׃
שֹׁפְטִים ד׳:כ״ג
ויכנע אלהים ביום ההוא את יבין מלך כנען לפני בני ישראל׃
שֹׁפְטִים ד׳:כ״ד
ותלך יד בני ישראל הלוך וקשה על יבין מלך כנען עד אשר הכריתו את יבין מלך כנען׃