פסוקים על God: Unclassified scriptures relating to

אולם אני אדרש אל אל ואל אלהים אשים דברתי׃

עשה גדלות ואין חקר נפלאות עד אין מספר׃

הנתן מטר על פני ארץ ושלח מים על פני חוצות׃

לשום שפלים למרום וקדרים שגבו ישע׃

מפר מחשבות ערומים ולא תעשינה ידיהם תושיה׃

לכד חכמים בערמם ועצת נפתלים נמהרה׃

יומם יפגשו חשך וכלילה ימששו בצהרים׃

וישע מחרב מפיהם ומיד חזק אביון׃

ותהי לדל תקוה ועלתה קפצה פיה׃

הנה אשרי אנוש יוכחנו אלוה ומוסר שדי אל תמאס׃

כי הוא יכאיב ויחבש ימחץ וידו תרפינה׃

בשש צרות יצילך ובשבע לא יגע בך רע׃

ברעב פדך ממות ובמלחמה מידי חרב׃

אמנם ידעתי כי כן ומה יצדק אנוש עם אל׃

אם יחפץ לריב עמו לא יעננו אחת מני אלף׃

חכם לבב ואמיץ כח מי הקשה אליו וישלם׃

המעתיק הרים ולא ידעו אשר הפכם באפו׃

המרגיז ארץ ממקומה ועמודיה יתפלצון׃

האמר לחרס ולא יזרח ובעד כוכבים יחתם׃

נטה שמים לבדו ודורך על במתי ים׃

עשה עש כסיל וכימה וחדרי תמן׃

עשה גדלות עד אין חקר ונפלאות עד אין מספר׃

הן יעבר עלי ולא אראה ויחלף ולא אבין לו׃

הן יחתף מי ישיבנו מי יאמר אליו מה תעשה׃

אלוה לא ישיב אפו תחתו שחחו עזרי רהב׃