פסוקים על Babylon

186 פסוקים · 73 היבטים

פסוקי מפתח

סינון לפי ספר
  1. תְהִלִּים קל״ז:ו׳

    תדבק לשוני לחכי אם לא אזכרכי אם לא אעלה את ירושלם על ראש שמחתי׃

  2. יְשַׁעְיָהוּ י״ג:א׳

    ¶ משא בבל אשר חזה ישעיהו בן אמוץ׃

  3. יְשַׁעְיָהוּ י״ג:ב׳

    על הר נשפה שאו נס הרימו קול להם הניפו יד ויבאו פתחי נדיבים׃

  4. יְשַׁעְיָהוּ י״ג:ג׳

    אני צויתי למקדשי גם קראתי גבורי לאפי עליזי גאותי׃

  5. יְשַׁעְיָהוּ י״ג:ד׳

    קול המון בהרים דמות עם רב קול שאון ממלכות גוים נאספים יהוה צבאות מפקד צבא מלחמה׃

  6. יְשַׁעְיָהוּ י״ג:ה׳

    באים מארץ מרחק מקצה השמים יהוה וכלי זעמו לחבל כל הארץ׃

  7. יְשַׁעְיָהוּ י״ג:ו׳

    הילילו כי קרוב יום יהוה כשד משדי יבוא׃

  8. יְשַׁעְיָהוּ י״ג:ז׳

    על כן כל ידים תרפינה וכל לבב אנוש ימס׃

  9. יְשַׁעְיָהוּ י״ג:ח׳

    ונבהלו צירים וחבלים יאחזון כיולדה יחילון איש אל רעהו יתמהו פני להבים פניהם׃

  10. יְשַׁעְיָהוּ י״ג:ט׳

    הנה יום יהוה בא אכזרי ועברה וחרון אף לשום הארץ לשמה וחטאיה ישמיד ממנה׃

  11. יְשַׁעְיָהוּ י״ג:י׳

    כי כוכבי השמים וכסיליהם לא יהלו אורם חשך השמש בצאתו וירח לא יגיה אורו׃

  12. יְשַׁעְיָהוּ י״ג:י״א

    ופקדתי על תבל רעה ועל רשעים עונם והשבתי גאון זדים וגאות עריצים אשפיל׃

  13. יְשַׁעְיָהוּ י״ג:י״ב

    אוקיר אנוש מפז ואדם מכתם אופיר׃

  14. יְשַׁעְיָהוּ י״ג:י״ג

    על כן שמים ארגיז ותרעש הארץ ממקומה בעברת יהוה צבאות וביום חרון אפו׃

  15. יְשַׁעְיָהוּ י״ג:י״ד

    והיה כצבי מדח וכצאן ואין מקבץ איש אל עמו יפנו ואיש אל ארצו ינוסו׃

  16. יְשַׁעְיָהוּ י״ג:ט״ו

    כל הנמצא ידקר וכל הנספה יפול בחרב׃

  17. יְשַׁעְיָהוּ י״ג:ט״ז

    ועלליהם ירטשו לעיניהם ישסו בתיהם ונשיהם תשגלנה׃

  18. יְשַׁעְיָהוּ י״ג:י״ז

    הנני מעיר עליהם את מדי אשר כסף לא יחשבו וזהב לא יחפצו בו׃

  19. יְשַׁעְיָהוּ י״ג:י״ח

    וקשתות נערים תרטשנה ופרי בטן לא ירחמו על בנים לא תחוס עינם׃

  20. יְשַׁעְיָהוּ י״ג:י״ט

    והיתה בבל צבי ממלכות תפארת גאון כשדים כמהפכת אלהים את סדם ואת עמרה׃

  21. יְשַׁעְיָהוּ י״ג:כ׳

    לא תשב לנצח ולא תשכן עד דור ודור ולא יהל שם ערבי ורעים לא ירבצו שם׃

  22. יְשַׁעְיָהוּ י״ג:כ״א

    ורבצו שם ציים ומלאו בתיהם אחים ושכנו שם בנות יענה ושעירים ירקדו שם׃

  23. יְשַׁעְיָהוּ י״ג:כ״ב

    וענה איים באלמנותיו ותנים בהיכלי ענג וקרוב לבוא עתה וימיה לא ימשכו׃

  24. יְשַׁעְיָהוּ י״ד:א׳

    ¶ כי ירחם יהוה את יעקב ובחר עוד בישראל והניחם על אדמתם ונלוה הגר עליהם ונספחו על בית יעקב׃

  25. יְשַׁעְיָהוּ י״ד:ב׳

    ולקחום עמים והביאום אל מקומם והתנחלום בית ישראל על אדמת יהוה לעבדים ולשפחות והיו שבים לשביהם ורדו בנגשיהם׃