פסוקים על Astronomy: Sidereal phenomena

אז ידבר יהושע ליהוה ביום תת יהוה את האמרי לפני בני ישראל ויאמר לעיני ישראל שמש בגבעון דום וירח בעמק אילון׃

וידם השמש וירח עמד עד יקם גוי איביו הלא היא כתובה על ספר הישר ויעמד השמש בחצי השמים ולא אץ לבוא כיום תמים׃

ולא היה כיום ההוא לפניו ואחריו לשמע יהוה בקול איש כי יהוה נלחם לישראל׃

המרגיז ארץ ממקומה ועמודיה יתפלצון׃

האמר לחרס ולא יזרח ובעד כוכבים יחתם׃

נטה שמים לבדו ודורך על במתי ים׃

עשה עש כסיל וכימה וחדרי תמן׃

וכסיתי בכבותך שמים והקדרתי את ככביהם שמש בענן אכסנו וירח לא יאיר אורו׃

כל מאורי אור בשמים אקדירם עליך ונתתי חשך על ארצך נאם אדני יהוה׃

והיה בימים ההם אחרי הצרה ההיא תחשך השמש והירח לא יגיה אורו׃

והכוכבים יפלו מן השמים וכחות השמים יתמוטטו׃

ויהי כשעה הששית והנה חשך על כל הארץ עד השעה התשיעית׃

ויחשך השמש ותקרע פרכת ההיכל לשנים קרעים׃

ונתתי מופתים בשמים ממעל ואתות בארץ מתחת דם ואש ותימרות עשן׃

השמש יהפך לחשך והירח לדם לפני בוא יום יהוה הגדול והנורא׃

וארא בפתחו את החותם הששי והנה רעש גדול היה ויקדר השמש כשק שער והירח נהפך לדם׃

וכוכבי השמים נפלו ארצה כאשר תנוע תאנה ברוח חזקה והשליכה פגיה׃

והשמים משו כספר נגלל וכל הר ואי הנתקו ממקומם׃

והמלאך השלישי תקע בשופר ויפל מן השמים כוכב גדול בער כלפיד ויפל על שלישית הנהרות ועל מעינות המים׃

ושם הכוכב נקרא לענה ותהי שלישית המים ללענה ורבים מבני אדם מתו מן המים כי מרים היו׃

והמלאך הרביעי תקע בשופר ותכה שלישית השמש ושלישית הירח ושלישית הכוכבים למען תחשך שלישיתם והיום לא יאיר שלישיתו וכן גם הלילה׃

¶ והמלאך החמישי תקע בשופר וארא כוכב נפל מן השמים לארץ וינתן לו מפתח באר התהום׃

ויפתח את באר התהום ויעל עשן מן הבאר כעשן כבשן גדול ויחשך השמש והרקיע מקיטר הבאר׃

¶ וארא מלאך אחר אביר יורד מן השמים והוא עטה ענן ועל ראשו כמראה קשת הענן ופניו כשמש ורגליו כעמודי אש׃

ובידו ספר קטן פתוח וישם את רגל ימינו על הים ואת שמאלו על הארץ׃