TRV
מתיו כ״ז:א׳-כ״ו
א׳
¶ ויהי לפנות הבקר ויתיעצו כל ראשי הכהנים וזקני העם על ישוע להמיתו׃
ב׳
ויאסרו אתו ויוליכהו משם וימסרהו אל פונטיוס פילטוס ההגמון׃
ג׳
וירא יהודה המסר אותו כי הרשיעהו וינחם וישב את שלשים הכסף אל הכהנים הגדולים והזקנים לאמר׃
ד׳
חטאתי כי דם נקי הסגרתי והם אמרו מה לנו ולזאת אתה תראה׃
ה׳
וישלך את הכסף אל ההיכל ויפן וילך ויחנק׃
ו׳
ויקחו ראשי הכהנים את הכסף ויאמרו לא נכון לנו לתתו אל ארון הקרבן כי מחיר דמים הוא׃
ז׳
ויתיעצו ויקנו בו את שדה היוצר לקבורת הגרים׃
ח׳
על כן שם השדה ההוא שדה הדם עד היום הזה׃
ט׳
אז נתמלא מה שנאמר ביד ירמיה הנביא ויקחו שלשים הכסף אדר היקר אשר יקר מעל בני ישראל׃
י׳
ויתנו אתם אל שדה היוצר כאשר צוני יהוה׃
י״א
וישוע העמד לפני ההגמון וישאלהו ההגמון לאמר האתה הוא מלך היהודים ויאמר ישוע אתה אמרת׃
י״ב
וידברו עליו שטנה הכהנים הגדולים והזקנים והוא לא ענה דבר׃
י״ג
ויאמר אליו פילטוס האינך שמע כמה הם מעידים בך׃
י״ד
ולא ענהו אף דבר אחד ויתמה ההגמון עד מאד׃
ט״ו
ומנהג ההגמון היה לפטר לעם בכל חג אסיר אחד את אשר יחפצו׃
ט״ז
ובעת ההיא היה להם אסיר ידוע ושמו בר אבא׃
י״ז
ויהי כאשר נקהלו ויאמר אליהם פילטוס את מי תחפצו כי אפטר לכם את בר אבא או את ישוע הנקרא בשם משיח׃
י״ח
כי ידע אשר רק מקנאה מסרו אתו׃
י״ט
ויהי כשבתו על כסא הדין ותשלח אליו אשתו לאמר אל יהי לך דבר עם הצדיק הזה כי בעבורו עניתי הרבה היום בחלום׃
כ׳
והכהנים הגדולים והזקנים פתו את המון העם לשאל להם את בר אבא ולאבד את ישוע׃
כ״א
ויען ההגמון ויאמר אליהם את מי משניהם תחפצו כי אפטר לכם ויאמרו את בר אבא׃
כ״ב
ויאמר אליהם פילטוס ומה אעשה לישוע הנקרא בשם משיח ויענו כלם יצלב׃
כ״ג
ויאמר ההגמון מה אפוא הרעה אשר עשה ויוסיפו עוד צעק לאמר יצלב׃
כ״ד
ויהי כראות פילטוס כי לא יועיל מאומה ורבתה עוד המהודה ויקח מים וירחץ את ידיו לעיני העם ויאמר נקי אנכי מדם הצדיק הזה אתם תראו׃
כ״ה
ויענו כל העם ויאמרו דמו עלינו ועל בנינו׃
כ״ו
אז פטר להם את בר אבא ואת ישוע הכה בשוטים וימסר אותו להצלב׃
Settings