פסוקים על Seekers

זה דור דרשו מבקשי פניך יעקב סלה׃

הדריכני באמתך ולמדני כי אתה אלהי ישעי אותך קויתי כל היום׃

עיני תמיד אל יהוה כי הוא יוציא מרשת רגלי׃

אחת שאלתי מאת יהוה אותה אבקש שבתי בבית יהוה כל ימי חיי לחזות בנעם יהוה ולבקר בהיכלו׃

לך אמר לבי בקשו פני את פניך יהוה אבקש׃

קוה אל יהוה חזק ויאמץ לבך וקוה אל יהוה׃

נפשנו חכתה ליהוה עזרנו ומגננו הוא׃

דרשתי את יהוה וענני ומכל מגורותי הצילני׃

כפירים רשו ורעבו ודרשי יהוה לא יחסרו כל טוב׃

¶ למנצח לדוד מזמור קוה קויתי יהוה ויט אלי וישמע שועתי׃

ויעלני מבור שאון מטיט היון ויקם על סלע רגלי כונן אשרי׃

ויתן בפי שיר חדש תהלה לאלהינו יראו רבים וייראו ויבטחו ביהוה׃

אשרי הגבר אשר שם יהוה מבטחו ולא פנה אל רהבים ושטי כזב׃

¶ למנצח משכיל לבני קרח כאיל תערג על אפיקי מים כן נפשי תערג אליך אלהים׃

צמאה נפשי לאלהים לאל חי מתי אבוא ואראה פני אלהים׃

היתה לי דמעתי לחם יומם ולילה באמר אלי כל היום איה אלהיך׃

אלה אזכרה ואשפכה עלי נפשי כי אעבר בסך אדדם עד בית אלהים בקול רנה ותודה המון חוגג׃

¶ מזמור לדוד בהיותו במדבר יהודה אלהים אלי אתה אשחרך צמאה לך נפשי כמה לך בשרי בארץ ציה ועיף בלי מים׃

כן בקדש חזיתיך לראות עזך וכבודך׃

כי טוב חסדך מחיים שפתי ישבחונך׃

כן אברכך בחיי בשמך אשא כפי׃

כמו חלב ודשן תשבע נפשי ושפתי רננות יהלל פי׃

אם זכרתיך על יצועי באשמרות אהגה בך׃

כי היית עזרתה לי ובצל כנפיך ארנן׃

דבקה נפשי אחריך בי תמכה ימינך׃