פסוקים על Rachel

עודנו מדבר עמם ורחל באה עם הצאן אשר לאביה כי רעה הוא׃

ויהי כאשר ראה יעקב את רחל בת לבן אחי אמו ואת צאן לבן אחי אמו ויגש יעקב ויגל את האבן מעל פי הבאר וישק את צאן לבן אחי אמו׃

וישק יעקב לרחל וישא את קלו ויבך׃

ויגד יעקב לרחל כי אחי אביה הוא וכי בן רבקה הוא ותרץ ותגד לאביה׃

ויאמר לבן ליעקב הכי אחי אתה ועבדתני חנם הגידה לי מה משכרתך׃

וללבן שתי בנות שם הגדלה לאה ושם הקטנה רחל׃

ועיני לאה רכות ורחל היתה יפת תאר ויפת מראה׃

ויאהב יעקב את רחל ויאמר אעבדך שבע שנים ברחל בתך הקטנה׃

ויאמר לבן טוב תתי אתה לך מתתי אתה לאיש אחר שבה עמדי׃

ויעבד יעקב ברחל שבע שנים ויהיו בעיניו כימים אחדים באהבתו אתה׃

ויאמר יעקב אל לבן הבה את אשתי כי מלאו ימי ואבואה אליה׃

ויאסף לבן את כל אנשי המקום ויעש משתה׃

ויהי בערב ויקח את לאה בתו ויבא אתה אליו ויבא אליה׃

ויתן לבן לה את זלפה שפחתו ללאה בתו שפחה׃

ויהי בבקר והנה הוא לאה ויאמר אל לבן מה זאת עשית לי הלא ברחל עבדתי עמך ולמה רמיתני׃

ויאמר לבן לא יעשה כן במקומנו לתת הצעירה לפני הבכירה׃

מלא שבע זאת ונתנה לך גם את זאת בעבדה אשר תעבד עמדי עוד שבע שנים אחרות׃

ויעש יעקב כן וימלא שבע זאת ויתן לו את רחל בתו לו לאשה׃

ויתן לבן לרחל בתו את בלהה שפחתו לה לשפחה׃

ויבא גם אל רחל ויאהב גם את רחל מלאה ויעבד עמו עוד שבע שנים אחרות׃

וירא יהוה כי שנואה לאה ויפתח את רחמה ורחל עקרה׃

¶ ותרא רחל כי לא ילדה ליעקב ותקנא רחל באחתה ותאמר אל יעקב הבה לי בנים ואם אין מתה אנכי׃

ויחר אף יעקב ברחל ויאמר התחת אלהים אנכי אשר מנע ממך פרי בטן׃

ותאמר הנה אמתי בלהה בא אליה ותלד על ברכי ואבנה גם אנכי ממנה׃

ותתן לו את בלהה שפחתה לאשה ויבא אליה יעקב׃