פסוקים על Nebuzar-Adan

45 פסוקים · 2 היבטים

פסוקי מפתח

2 מְלָכִים כ״ה:ח׳
ובחדש החמישי בשבעה לחדש היא שנת תשע עשרה שנה למלך נבכדנאצר מלך בבל בא נבוזראדן רב טבחים עבד מלך בבל ירושלם׃
2 מְלָכִים כ״ה:ט׳
וישרף את בית יהוה ואת בית המלך ואת כל בתי ירושלם ואת כל בית גדול שרף באש׃
2 מְלָכִים כ״ה:י׳
ואת חומת ירושלם סביב נתצו כל חיל כשדים אשר רב טבחים׃
2 מְלָכִים כ״ה:י״א
ואת יתר העם הנשארים בעיר ואת הנפלים אשר נפלו על המלך בבל ואת יתר ההמון הגלה נבוזראדן רב טבחים׃
2 מְלָכִים כ״ה:י״ב
ומדלת הארץ השאיר רב טבחים לכרמים וליגבים׃
2 מְלָכִים כ״ה:י״ג
ואת עמודי הנחשת אשר בית יהוה ואת המכנות ואת ים הנחשת אשר בבית יהוה שברו כשדים וישאו את נחשתם בבלה׃
2 מְלָכִים כ״ה:י״ד
ואת הסירת ואת היעים ואת המזמרות ואת הכפות ואת כל כלי הנחשת אשר ישרתו בם לקחו׃
2 מְלָכִים כ״ה:ט״ו
ואת המחתות ואת המזרקות אשר זהב זהב ואשר כסף כסף לקח רב טבחים׃
2 מְלָכִים כ״ה:ט״ז
העמודים שנים הים האחד והמכנות אשר עשה שלמה לבית יהוה לא היה משקל לנחשת כל הכלים האלה׃
2 מְלָכִים כ״ה:י״ז
שמנה עשרה אמה קומת העמוד האחד וכתרת עליו נחשת וקומת הכתרת שלש אמה ושבכה ורמנים על הכתרת סביב הכל נחשת וכאלה לעמוד השני על השבכה׃
2 מְלָכִים כ״ה:י״ח
ויקח רב טבחים את שריה כהן הראש ואת צפניהו כהן משנה ואת שלשת שמרי הסף׃
2 מְלָכִים כ״ה:י״ט
ומן העיר לקח סריס אחד אשר הוא פקיד על אנשי המלחמה וחמשה אנשים מראי פני המלך אשר נמצאו בעיר ואת הספר שר הצבא המצבא את עם הארץ וששים איש מעם הארץ הנמצאים בעיר׃
2 מְלָכִים כ״ה:כ׳
ויקח אתם נבוזראדן רב טבחים וילך אתם על מלך בבל רבלתה׃
2 מְלָכִים כ״ה:כ״א
ויך אתם מלך בבל וימיתם ברבלה בארץ חמת ויגל יהודה מעל אדמתו׃
יִרְמְיָהוּ ל״ט:ט׳
ואת יתר העם הנשארים בעיר ואת הנפלים אשר נפלו עליו ואת יתר העם הנשארים הגלה נבוזר אדן רב טבחים בבל׃
יִרְמְיָהוּ ל״ט:י׳
ומן העם הדלים אשר אין להם מאומה השאיר נבוזראדן רב טבחים בארץ יהודה ויתן להם כרמים ויגבים ביום ההוא׃
יִרְמְיָהוּ ל״ט:י״א
ויצו נבוכדראצר מלך בבל על ירמיהו ביד נבוזראדן רב טבחים לאמר׃
יִרְמְיָהוּ ל״ט:י״ב
קחנו ועיניך שים עליו ואל תעש לו מאומה רע כי אם כאשר ידבר אליך כן עשה עמו׃
יִרְמְיָהוּ ל״ט:י״ג
וישלח נבוזראדן רב טבחים ונבושזבן רב סריס ונרגל שר אצר רב מג וכל רבי מלך בבל׃
יִרְמְיָהוּ ל״ט:י״ד
וישלחו ויקחו את ירמיהו מחצר המטרה ויתנו אתו אל גדליהו בן אחיקם בן שפן להוצאהו אל הבית וישב בתוך העם׃
יִרְמְיָהוּ מ׳:א׳
¶ הדבר אשר היה אל ירמיהו מאת יהוה אחר שלח אתו נבוזראדן רב טבחים מן הרמה בקחתו אתו והוא אסור באזקים בתוך כל גלות ירושלם ויהודה המגלים בבלה׃
יִרְמְיָהוּ מ׳:ב׳
ויקח רב טבחים לירמיהו ויאמר אליו יהוה אלהיך דבר את הרעה הזאת אל המקום הזה׃
יִרְמְיָהוּ מ׳:ג׳
ויבא ויעש יהוה כאשר דבר כי חטאתם ליהוה ולא שמעתם בקולו והיה לכם דבר הזה׃
יִרְמְיָהוּ מ׳:ד׳
ועתה הנה פתחתיך היום מן האזקים אשר על ידך אם טוב בעיניך לבוא אתי בבל בא ואשים את עיני עליך ואם רע בעיניך לבוא אתי בבל חדל ראה כל הארץ לפניך אל טוב ואל הישר בעיניך ללכת שמה לך׃
יִרְמְיָהוּ מ׳:ה׳
ועודנו לא ישוב ושבה אל גדליה בן אחיקם בן שפן אשר הפקיד מלך בבל בערי יהודה ושב אתו בתוך העם או אל כל הישר בעיניך ללכת לך ויתן לו רב טבחים ארחה ומשאת וישלחהו׃

מציג 1–25 מתוך 45 פסוקים

1 2 הבא