פסוקים על Jephthah

21 פסוקים · 12 היבטים

פסוקי מפתח

שֹׁפְטִים י״א:א׳
¶ ויפתח הגלעדי היה גבור חיל והוא בן אשה זונה ויולד גלעד את יפתח׃
שֹׁפְטִים י״א:ב׳
ותלד אשת גלעד לו בנים ויגדלו בני האשה ויגרשו את יפתח ויאמרו לו לא תנחל בבית אבינו כי בן אשה אחרת אתה׃
שֹׁפְטִים י״א:ה׳
ויהי כאשר נלחמו בני עמון עם ישראל וילכו זקני גלעד לקחת את יפתח מארץ טוב׃
שֹׁפְטִים י״א:ו׳
ויאמרו ליפתח לכה והייתה לנו לקצין ונלחמה בבני עמון׃
שֹׁפְטִים י״א:ז׳
ויאמר יפתח לזקני גלעד הלא אתם שנאתם אותי ותגרשוני מבית אבי ומדוע באתם אלי עתה כאשר צר לכם׃
שֹׁפְטִים י״א:ח׳
ויאמרו זקני גלעד אל יפתח לכן עתה שבנו אליך והלכת עמנו ונלחמת בבני עמון והיית לנו לראש לכל ישבי גלעד׃
שֹׁפְטִים י״א:ט׳
ויאמר יפתח אל זקני גלעד אם משיבים אתם אותי להלחם בבני עמון ונתן יהוה אותם לפני אנכי אהיה לכם לראש׃
שֹׁפְטִים י״א:י׳
ויאמרו זקני גלעד אל יפתח יהוה יהיה שמע בינותינו אם לא כדברך כן נעשה׃
שֹׁפְטִים י״א:י״א
וילך יפתח עם זקני גלעד וישימו העם אותו עליהם לראש ולקצין וידבר יפתח את כל דבריו לפני יהוה במצפה׃
שֹׁפְטִים י״א:כ״ט
ותהי על יפתח רוח יהוה ויעבר את הגלעד ואת מנשה ויעבר את מצפה גלעד וממצפה גלעד עבר בני עמון׃
שֹׁפְטִים י״א:ל׳
וידר יפתח נדר ליהוה ויאמר אם נתון תתן את בני עמון בידי׃
שֹׁפְטִים י״א:ל״א
והיה היוצא אשר יצא מדלתי ביתי לקראתי בשובי בשלום מבני עמון והיה ליהוה והעליתהו עולה׃
שֹׁפְטִים י״א:ל״ב
ויעבר יפתח אל בני עמון להלחם בם ויתנם יהוה בידו׃
שֹׁפְטִים י״א:ל״ג
ויכם מערוער ועד בואך מנית עשרים עיר ועד אבל כרמים מכה גדולה מאד ויכנעו בני עמון מפני בני ישראל׃
שֹׁפְטִים י״א:ל״ד
ויבא יפתח המצפה אל ביתו והנה בתו יצאת לקראתו בתפים ובמחלות ורק היא יחידה אין לו ממנו בן או בת׃
שֹׁפְטִים י״א:ל״ה
ויהי כראותו אותה ויקרע את בגדיו ויאמר אהה בתי הכרע הכרעתני ואת היית בעכרי ואנכי פציתי פי אל יהוה ולא אוכל לשוב׃
שֹׁפְטִים י״א:ל״ו
ותאמר אליו אבי פציתה את פיך אל יהוה עשה לי כאשר יצא מפיך אחרי אשר עשה לך יהוה נקמות מאיביך מבני עמון׃
שֹׁפְטִים י״א:ל״ז
ותאמר אל אביה יעשה לי הדבר הזה הרפה ממני שנים חדשים ואלכה וירדתי על ההרים ואבכה על בתולי אנכי ורעיתי׃
שֹׁפְטִים י״א:ל״ח
ויאמר לכי וישלח אותה שני חדשים ותלך היא ורעותיה ותבך על בתוליה על ההרים׃
שֹׁפְטִים י״א:ל״ט
ויהי מקץ שנים חדשים ותשב אל אביה ויעש לה את נדרו אשר נדר והיא לא ידעה איש ותהי חק בישראל׃
שֹׁפְטִים י״א:מ׳
מימים ימימה תלכנה בנות ישראל לתנות לבת יפתח הגלעדי ארבעת ימים בשנה׃