אִיּוֹבל״א

שבועת יושרו של איוב: טוהר העיניים

א׳
ברית כרתי לעיני ומה אתבונן על בתולה׃
ב׳
ומה חלק אלוה ממעל ונחלת שדי ממרמים׃
ג׳
הלא איד לעול ונכר לפעלי און׃
ד׳
הלא הוא יראה דרכי וכל צעדי יספור׃

יושר ותום הלב במעשים

ה׳
אם הלכתי עם שוא ותחש על מרמה רגלי׃
ו׳
ישקלני במאזני צדק וידע אלוה תמתי׃
ז׳
אם תטה אשרי מני הדרך ואחר עיני הלך לבי ובכפי דבק מאום׃
ח׳
אזרעה ואחר יאכל וצאצאי ישרשו׃

מחויבות לנאמנות בנישואים

ט׳
אם נפתה לבי על אשה ועל פתח רעי ארבתי׃
י׳
תטחן לאחר אשתי ועליה יכרעון אחרין׃
י״א
כי הוא זמה והיא עון פלילים׃
י״ב
כי אש היא עד אבדון תאכל ובכל תבואתי תשרש׃

צדק ביחס למשרתים

י״ג
אם אמאס משפט עבדי ואמתי ברבם עמדי׃
י״ד
ומה אעשה כי יקום אל וכי יפקד מה אשיבנו׃
ט״ו
הלא בבטן עשני עשהו ויכננו ברחם אחד׃

נדיבות לעניים ולחסרי ישע

ט״ז
אם אמנע מחפץ דלים ועיני אלמנה אכלה׃
י״ז
ואכל פתי לבדי ולא אכל יתום ממנה׃
י״ח
כי מנעורי גדלני כאב ומבטן אמי אנחנה׃
י״ט
אם אראה אובד מבלי לבוש ואין כסות לאביון׃
כ׳
אם לא ברכוני חלצו ומגז כבשי יתחמם׃
כ״א
אם הניפותי על יתום ידי כי אראה בשער עזרתי׃
כ״ב
כתפי משכמה תפול ואזרעי מקנה תשבר׃
כ״ג
כי פחד אלי איד אל ומשאתו לא אוכל׃

דחיית החומרנות ועבודת האלילים

כ״ד
אם שמתי זהב כסלי ולכתם אמרתי מבטחי׃
כ״ה
אם אשמח כי רב חילי וכי כביר מצאה ידי׃
כ״ו
אם אראה אור כי יהל וירח יקר הלך׃
כ״ז
ויפת בסתר לבי ותשק ידי לפי׃
כ״ח
גם הוא עון פלילי כי כחשתי לאל ממעל׃

מוסר כלפי אויבים וזרים

כ״ט
אם אשמח בפיד משנאי והתעררתי כי מצאו רע׃
ל׳
ולא נתתי לחטא חכי לשאל באלה נפשו׃
ל״א
אם לא אמרו מתי אהלי מי יתן מבשרו לא נשבע׃
ל״ב
בחוץ לא ילין גר דלתי לארח אפתח׃

סירוב להסתיר חטא

ל״ג
אם כסיתי כאדם פשעי לטמון בחבי עוני׃
ל״ד
כי אערוץ המון רבה ובוז משפחות יחתני ואדם לא אצא פתח׃
ל״ה
מי יתן לי שמע לי הן תוי שדי יענני וספר כתב איש ריבי׃
ל״ו
אם לא על שכמי אשאנו אענדנו עטרות לי׃
ל״ז
מספר צעדי אגידנו כמו נגיד אקרבנו׃

צדק בענייני הארץ

ל״ח
אם עלי אדמתי תזעק ויחד תלמיה יבכיון׃
ל״ט
אם כחה אכלתי בלי כסף ונפש בעליה הפחתי׃
מ׳
תחת חטה יצא חוח ותחת שערה באשה תמו דברי איוב׃
Use ← → arrow keys to navigate
Settings

Reading Style

Typeface

Font Size 19px

Reading Width 45 chars

Options